प्रदीप सिंह, लहान
सिराहा जिल्लाको लहान नगरपालिका तथा मधेश प्रदेशका विभिन्न क्षेत्रमा आज दिउँसो २ बजेर ५२ मिनेटमा भूकम्पको धक्का महसुस गरिएको छ। भूकम्पको झट्का मधेश प्रदेशको राजधानी जनकपुरसहित आसपासका जिल्लाहरूमा समेत अनुभूति भएको थियो।
भूकम्पको धक्का महसुस हुनेबित्तिकै स्थानीयवासी त्रसित भई घरबाट बाहिर निस्केर सुरक्षित स्थानमा पुगेका थिए। विशेषगरी बहु–तले भवन तथा पुराना घर भएका क्षेत्रका मानिसहरू बढी भयभीत देखिएका छन्।
हालसम्म कुनै ठूला क्षति वा घाइते भएको विवरण प्राप्त नभए पनि भूकम्पको प्रभावबारे थप जानकारी संकलन भइरहेको छ। भूकम्पको केन्द्रबिन्दु तथा मापनबारे आधिकारिक निकायको प्रतिक्षा गरिएको छ।
स्थानीयवासी भन्छन्, “हामीले अचानक घर हल्लिएको महसुस गर्यौं र सबैजना डराएर बाहिर निस्कियौं। केही क्षणपछि अवस्था सामान्य भएपछि मात्र पुनः घर फर्कियौं।”
यसअघि पनि मधेशमा साना–ठूला भूकम्पका झट्का महसुस हुँदै आएका छन्। विज्ञहरूका अनुसार तराई–मधेश भूकम्पीय जोखिमयुक्त क्षेत्रमध्ये एक भएकाले सचेत रहन आवश्यक छ।
