सिरहा। माध्यमिक शिक्षा परीक्षा (एसईई) को पहिलो दिनमै परीक्षा प्रणालीमाथि गम्भीर प्रश्न उठ्ने घटना भएको छ। परीक्षा सुरू भएको २० मिनेटमै अंग्रेजी विषयको प्रश्नपत्र बाहिरिएको पुष्टि भएको छ।
सूचनाका अनुसार सिरहाको लहान-१९ स्थित सोनमती गाढा, जनता बनवाली माध्यमिक विद्यालय वर्छवा, र कल्याणपुर परीक्षा केन्द्रबाट प्रश्नपत्र बाहिरिएको बताइएको छ। स्रोतका अनुसार निजी विद्यालयहरूको सेटिङमा केन्द्राध्यक्ष तथा प्रहरी प्रशासनको संलग्नतासहित मोबाइलको प्रयोग गरी प्रश्नपत्र बाहिरिएको दाबी गरिएको छ।
जिल्ला परीक्षा समन्वय समितिका संयोजक एवं प्रमुख जिल्ला अधिकारी बासुदेव दाहालका अनुसार परीक्षा मर्यादित बनाउन ५० जना विशेष टोली खटाइएको छ। उनले भने, “पातसमेत हल्लिन दिएको छैन। प्रश्नपत्र कसरी बाहिरियो भन्नेबारे अनुसन्धान भइरहेको छ। दोषी पत्ता लागे कडा कारबाही हुनेछ।”
यस वर्ष परीक्षा केन्द्रहरूमा मोबाइल र अन्य चिटिङ उपकरणहरूमा पूर्ण प्रतिबन्ध लगाइएको थियो। तर, प्रश्नपत्र बाहिरिएको घटनाले सुरक्षा संयन्त्रमै मिलेमतो भएको आशंका जन्माएको छ। स्थानीयबासीले प्रहरी प्रशासन र केन्द्राध्यक्षकै संलग्नता रहेको दाबी गरेका छन्।
सिरहाका ५० परीक्षा केन्द्रमा यस वर्ष १०,७०३ जना परीक्षार्थी सहभागी छन्। यस घटनाले परीक्षाको विश्वसनीयतामाथि गम्भीर प्रश्न खडा गरेको छ। अब दोषीमाथि के कारबाही हुन्छ भन्ने चासो बढेको छ।
