लहान :चुरे विनासले खासगरि मधेशका जिल्लाहरुमा प्रतिकुल असर पारेको भन्दै सरोकारवालाले यसको संरक्षणमा तीनै तहको सरकारको साथसाथै राज्यका अंगहरुबिच समन्वय र सहकार्य आवश्यक रहेको बताएका छन् ।
‘चुरेको माटो चुरेलाई, सफा पानी सबैलाई’ भन्ने मुल ध्ययका साथ मधेश प्रदेश वन तथा वातावरण मन्त्रालयले सिरहाको लहानस्थित हात्तीदह सिमसार तथा पर्यटकीय क्षत्रको सभाहलमा आयोजित चुरे सम्वाद कार्यक्रममा बोल्ने वक्ताहरुले चुरे संरक्षणको लागि संघीय, प्रादेशिक, स्थानीय सरकार, स्थानीय समुदाय, सरोकार भएका निकायको समन्वय, सहकार्य र संयुक्त प्रयास अपरिहार्य रहने बताएका हुन् ।
कार्यक्रमका मधेश प्रदेश वन तथा वातावरण मन्त्रालयका सचिव उद्धव बहादुर घिमिरेले चुरे क्षेत्र मधेशको जीवनसँग जोडिएको बताउँदै यसको संरक्षण गर्नु सबैको बराबर दायित्व भएको बताउनुभयो । “राज्यका निकायहरुले चुरे क्षेत्रलाई आफ्नै ठानेर समन्वय, सहकार्य र सहअस्तित्वको आधारमा यसको संरक्षणमा जोड दिन एकदमै आवश्यक रहेको छ”, उहाँले भन्नुभयो,“चुरेले सबैलाई समेट्ने भएकाले स्थानीय पालिका प्रमुखको नेतृत्वमा समन्वय र सहकार्य गरिदा उत्तम देखिन्छ ।”
कार्यक्रममो प्रदेश वन निर्देशनालय जनकपुरका प्रेदश वन निर्देशक जगन्नाथ प्रसाद जयसवालले वन विनास र चुरे क्षेत्रको प्राकृतिक स्रोतसाधन माथिको अवैध दोहनका कारण जमिन मुनिको पानीको सतह सुक्दै गएकाले स्थिति भयावह बन्दै गएको बताउनुभयो । उहाँले चुरेको संरक्षणको लागि सबै निकाय र संयन्त्रको उत्तीकै जिम्मेवारी रहेकाले जमिनमा ‘वाटर रिचार्ज’को लागि जलाधार क्षेत्रको संरक्षण तथा पानी पोखरीहरु निर्माणमा जोड दिनुपर्ने धारण राख्नुभयो ।
त्यसैगरि डिभिजन वन कार्यालय धनुषाका प्रमुख विनोद सिंहले चुरेको अवस्था र यसको संरक्षण तथा व्यवस्थापनका लागि हालसम्म गरिएका कार्यक्रमहरुको प्रगतिको अवस्था बारेमा ‘पावरपोइन्ट’ प्रस्तुतिकरण गर्नुभएको थियो ।
कार्यक्रममा धनुषा, सिरहा, सप्तरी र उदयपुर गरि चार जिल्लाका डिभिजन वन कार्यालयका प्रमुख तथा प्रतिनिधि, सामुदायिक वनका प्रतिनिधि, स्थानीय तहका जन प्रतिनिधि, भू—तथा जलाधार कार्यालयका प्रतिनिधि, जिल्ला समन्वय समितिका प्रतिनिधिहरुको उपस्थिति रहेको थियो ।
