नयाँ दिल्ली, १६ बैशाख : भारतीय प्रधानमन्त्री नरेन्द्र मोदीले मंगलबार क्यानडाका नवनिर्वाचित प्रधानमन्त्री मार्क कार्नीलाई निर्वाचन जितको बधाई दिँदै दुबै देशबीचको सम्बन्ध मजबुत पार्ने आशा व्यक्त गरेका छन्।
हाम्रो साझेदारी सुदृढ गर्न र जनताको हितमा थप अवसरहरू अनलक गर्न तपाईं सँग सहकार्य गर्न उत्साहित छु,” प्रधानमन्त्री मोदीको वक्तव्यमा उल्लेख गरिएको छ।
मोदीले भारत र क्यानडा साझा लोकतान्त्रिक मूल्य, कानूनको शासनप्रति प्रतिबद्धता र जनस्तरको सम्बन्धद्वारा आबद्ध रहेको पनि बताएका छन्।
भारत र क्यानडाबीचको सम्बन्ध २०२३ मा क्यानडाका एक सिख नागरिक हरदीप सिंह निज्जरको हत्या प्रकरणपछि चिसिएको थियो। निज्जर “खालिस्तान” अभियानका अगुवा थिए, जसले भारतको भूभागबाट अलग सिख राज्य माग गर्दै आएको छ। क्यानडाले निज्जरको हत्यामा भारतको संलग्नताको आरोप लगाएको थियो, जुन भारतले अस्वीकार गर्दै आएको छ।
यस प्रकरणपछि दुवै देशले आफ्ना कूटनीतिज्ञहरू फिर्ता बोलाउँदै सम्बन्धमा थप तनाव ल्याएका थिए। भारतले खालिस्तान आन्दोलनलाई आतंकवादसँग जोड्दै कडा कारबाहीको माग गर्दै आएको छ, जबकि पश्चिमी मुलुकहरूमा ठूलो संख्यामा सिख समुदाय बसोबास गर्दै आएको छ।
