सिरहा २ जेठ ।सिरहाको भगवानपुर गाउँपालिका–३ अभयनगरमा घरायसी विवादले उग्र रूप लिँदा ६ जना गम्भीर घाइते भएका छन्। छिमेकीबीच भएको भनाभन लाठी, ढुंगा र घरेलु हतियार प्रयोगसम्म पुग्दा पत्रकारसहित थप ३ जना सामान्य घाइते भएका हुन्।
घाइते हुनेमा ९७ वर्षीय रामप्रसाद यादव, मलभोगिया देवी यादव (३५), देव नारायण यादव (३६), ललिला देवी यादव (३५), सूरज कुमार यादव (१८) र बिरेन्द्र कुमार यादव (२९) रहेका छन्। उनीहरूको लहानस्थित एडभान्स अस्पतालमा उपचार भइरहेको छ।
विवाद घरको छानोबाट पानी छिमेकीको जमिनमा झर्ने विषयबाट सुरु भएको बताइएको छ। झगडाका क्रममा दुबै पक्षबाट हात हालाहाल र ढुंगामुढा भएको थियो।
घटनास्थलमा पुगेका एबी न्यूज फोर केका पत्रकार मनु यादवसहित थप दुई पत्रकार घाइते भएका छन्। भिड नियन्त्रणको प्रयास गर्दा उनीहरू सामान्य घाइते भएका हुन्।
घटनापछि ठाडी प्रहरी चौकीबाट प्रहरी टोली परिचालन गरिएको थियो। प्रहरीले दुबै पक्षका घाइतेलाई उपचारका लागि अस्पताल पठाएको छ।
घाइतेहरूको अवस्था हाल खतरामुक्त रहेको अस्पताल स्रोतले जनाएको छ।
