लहान, जेष्ठ ४ गते – सिरहामा लागूऔषध कारोबार र अवैध रकम ओसारपसारमा संलग्न पाँच जनालाई प्रहरीले विभिन्न स्थानबाट पक्राउ गरेको छ।
गोप्य सूचनाका आधारमा २०८२ साल जेठ २ गते साँझ ६ः३० बजे लहान नगरपालिका–१२ स्थित भोटिया चौकबाट को ५ प ६९२७ नम्बरको पल्सर मोटरसाइकलमा सवार लहान–२२ का ३२ वर्षीय दिनेश कुमार यादव र उनकी २६ वर्षीया बहिनी किरण कुमारी यादवलाई नियन्त्रणमा लिइएको सिरहा प्रहरीले जनाएको छ। उनीहरूका साथबाट २२.९० ग्राम खैरो हिरोइन, नगद ५१ हजार ४५० रुपैयाँ र एक थान मोबाइल बरामद गरिएको हो।
अनुसन्धानका क्रममा दिनेश यादवको घरबाट थप १८६ ग्राम खैरो हिरोइन, ५४ लाख १४ हजार २८५ रुपैयाँ नेपाली, ३५ हजार ७८० रुपैयाँ भारतीय नगद, चार थान मोबाइल र एक थान डिजिटल तराजु समेत बरामद गरिएको प्रहरीले जनाएको छ। यादव यसअघि पनि २०८० सालमा लागुऔषध सम्बन्धी मुद्दामा पक्राउ परिसकेका थिए।
त्यसैगरी, २०८२ जेठ ३ गते बरियारपट्टि गाउँपालिका–३ चमार टोलबाट भारतको लदनिया हुँदै आएका २० वर्षीय कृष्ण कुमार यादव र १९ वर्षीय निरज रायलाई मोटरसाइकलसहित पक्राउ गरिएको थियो। उनीहरूको साथबाट ७१० मिलिग्राम खैरो हिरोइन बरामद भएको प्रहरीले जनाएको छ।
उक्त दिन दिउँसो ३ बजे सिरहा नगरपालिका–२ महावीर चौक नजिकै भारतको जयनगरबाट बसबिट्टा जाँदै गरेका ४५ वर्षीय संजय कारकलाई चेकजाँच गर्दा शरीरमा बाँधिएको हरियो कपडा र ‘क्नी ब्यान्डेज’ भित्र लुकाइएको १६ लाख ३८ हजार ३७० रुपैयाँ नगदसहित एक थान मोबाइल र मोटरसाइकल बरामद गरिएको हो।
पक्राउ परेकाहरूमाथि आवश्यक म्याद थप गरी अनुसन्धान जारी रहेको जिल्ला प्रहरी कार्यालय सिरहाले जनाएको छ।
