लहान १ असार । स्वादिलो तर बदनाम भइसकेको लहानको आँपको पहिचान जोगाउन लहान नगरपालिकाले यो वर्ष पनि ब्रान्डिङ, ग्रेडिङ र प्याकेजिङ गर्दै काठमाडौंमा स्टल सञ्चालन गरेको छ।
मालदह र बम्बई जातका अर्गानिक आँपहरू पाँच र दश किलोका प्याकेटमा बिक्रीमा छन्। विषादी हालेर पकाइएका आँपले लहानको नाम बदनाम बनाउँदै ल्याएको भन्दै नगर प्रमुख महेशप्रसाद चौधरीले “स्वास्थ्यमैत्री आँप मात्र बजारमा पठाइएको” जानकारी दिए।
सप्तरी र सिरहाका बगैंचामा किसानको रातदिनको मेहनतले फलेका यी आँप तर बजारमा मूल्य कम पाउँदैछन्। उत्पादन घटे पनि मूल्य नबढ्दा किसान चिन्तित छन्।
नेपालमा उत्पादित कुल आँपको ७६ प्रतिशत मधेसमा फल्ने तथ्यांक छ। तर सबैभन्दा बढी उत्पादन हुने सिरहा–सप्तरीमा शीतभण्डार नहुनु किसानका लागि बाधा बनेको छ।
प्रदेश सरकारले वर्षौंअघि आठ जिल्लामा शीतभण्डार बनाउने योजना ल्याए पनि अख्तियारमा पुगेको उजुरी र कार्यान्वयनमा चासो नहुँदा योजना अलपत्र परेको छ।
