सिरहा १ असार ।सिरहाको लहान नगरपालिका–२० बस्ने ४५ वर्षीय बिरोज महतोलाई प्रहरीले चोरी, डाँका, शरीर बन्धक तथा संगठित अपराधमा संलग्न रहेको अभियोगमा पक्राउ गरेको छ।
जिल्ला प्रहरी कार्यालय सिराहाका अनुसार २०७८ साल चैत १४ गते राति १२:१५ बजेतिर धनगढीमाई नगरपालिका–११ स्थित गोविन्दा फाइनान्स लिमिटेडमा हातहतियारसहितको समूहले आक्रमण गरेको थियो। नकाब लगाएर आएका अभियुक्तहरूले फाइनान्समा कार्यरत कर्मचारीलाई हातपात गरी नियन्त्रणमा लिएर कार्यालयमा भएको नगद र मोबाइल फोन लुटपाट गरेका थिए।
प्रहरीका अनुसार उक्त समूहले फाइनान्सबाट कुल नगद रू. २ लाख ४५ हजार ७८१ रुपैयाँ लुटेका थिए। साथै, घटनास्थलबाट POCO X3 Pro, Realme र Samsung Galaxy J2 मोबाइलसमेत लुटिएको थियो।
घटनापछि अनुसन्धानमा खटिएको जिल्ला प्रहरी कार्यालय सिराहाको टोलीले विशेष सूचनाको आधारमा बिरोज महतोलाई पक्राउ गर्न सफल भएको हो। उनलाई नियन्त्रणमा लिएर आवश्यक अनुसन्धानका लागि जिल्ला प्रहरी कार्यालयमा पेश गरिएको प्रहरीले जनाएको छ।
घटनाका सम्बन्धमा जानकारी दिँदै जिल्ला प्रहरी कार्यालय सिराहाका सूचना अधिकारी तथा डिएसपी (प्रहरी नायब उपरीक्षक) वीरेन्द्र पासमानले घटनामा संलग्न अन्य व्यक्तिहरूको खोजी कार्य तीव्र रूपमा अगाडि बढिरहेको जानकारी दिएका छन्।
