सिरहा, असार ६ – सिरहा जिल्लाको सिरहा नगरपालिका–१८ सन्हैठास्थित हुलाकी सडकमा मोटरसाइकल र साइकल एकआपसमा ठोक्किँदा तीनजनाको ज्यान गएको छ।
मृत्यु हुनेमा मोटरसाइकल चालक कल्याणपुर–१२ का २९ वर्षीय नरेश मुखिया, मोटरसाइकलको पछाडि सवार कल्याणपुर नगरपालिका–२ चतरीका २८ वर्षीय प्रदीप मुखिया र साइकल यात्री सिरहा नगरपालिका–२ का ६५ वर्षीय कुसे राय रहेको जिल्ला प्रहरी कार्यालय सिरहाका प्रवक्ता डिएसपी विरेन्द्रकुमार पासवानले जानकारी दिएका छन्।
आज साँझ सवा ५ बजेतिर पूर्वबाट पश्चिमतर्फ गइरहेको प्रदेश २–०१००३ प ३२३० नम्बरको मोटरसाइकल र पश्चिमबाट पूर्वतर्फ गइरहेको साइकल ठोक्किँदा दुर्घटना भएको थियो।
गम्भीर घाइते तीनैजनालाई तत्काल प्रादेशिक अस्पताल सिरहा लगिएकोमा चिकित्सकले मृत घोषणा गरेका हुन्। हाल मृतकहरूको शव पोष्टमार्टमका लागि अस्पतालमा राखिएको छ भने घटनाबारे थप अनुसन्धान भइरहेको प्रहरीले जनाएको छ।
