लहान १० असार । सिरहाको लहान नगरपालिका–२ मटिअर्वा टोलमा लागुऔषध कारोबारमा संलग्न रहेको आरोपमा तीन जना युवा पक्राउ परेका छन्।
जिल्ला प्रहरी कार्यालय सिरहा, लागुऔषध नियन्त्रण ब्युरो शाखा कार्यालय गोलबजार र इलाका प्रहरी कार्यालय लहानको संयुक्त टोलीले सोमबार साँझ साढे ७ बजे गोप्य सूचनाको आधारमा बिवेक यादवको घरमा छापा मारेको थियो।
प्रहरीले घर खानतलासीका क्रममा कालो प्लास्टिकको सानो पोका भित्र लुकाइ राखिएको १७.४९ ग्राम खैरो हेरोइन जस्तो देखिने लागुऔषध, एक थान डिजिटल तराजु र केही मोबाइल फोन बरामद गरेको जानकारी जिल्ला प्रहरी कार्यालय सिरहाका सूचना अधिकारी डिएसपी बिरेन्द्र कुमार पासवानले दिएका छन्।
पक्राउ पर्नेहरूमा लहान–२ का २३ वर्षीय बिवेक यादव, लहान–१ का २० वर्षीय सुरेश कुमार साह सुडी र लहान–२ का २७ वर्षीय राजकुमार विश्वकर्मा रहेका छन्।
प्रहरीका अनुसार बिवेक यादवको साथबाट दुई थान मोबाइल, सुरेश कुमार साह सुडीको साथबाट १७.४१ ग्राम खैरो हेरोइन र एक थान मोबाइल तथा राजकुमार विश्वकर्माको साथबाट पनि एक थान मोबाइल बरामद गरिएको छ।
तीनै जना विरुद्ध लागुऔषध सम्बन्धी मुद्दामा जिल्ला अदालत सिरहाबाट पाँच दिनको म्याद लिई अनुसन्धान थालिएको प्रहरीले जनाएको छ।
