सिरहा । प्रादेशिक अस्पताल सिरहामा चिकित्सकमाथि अभद्र व्यवहार र सुरक्षा प्रत्याभूतिको माग गर्दै आइतबारदेखि आकस्मिकबाहेक सबै सेवा बन्द गरिएको छ। अस्पतालका चिकित्सक तथा स्वास्थ्यकर्मीहरूले बाहिरङ्ग (ओपीडी) सेवा ठप्प पार्दै अस्पताल परिसरमा शान्ति सुरक्षा सुनिश्चित गर्न माग गरेका छन्।
गत शनिबार सिराहा नगरपालिका–६ का १२ वर्षीय राजन महराको उपचारका क्रममा मृत्यु भएको थियो। यस घटनापछि पीडित बालकका आफन्तहरू तथा वडा अध्यक्ष इन्द्रजित यादवसहितका व्यक्तिहरूले चिकित्सकमाथि गालीगलौज र हुलहुज्जत गरेको चिकित्सकहरूले आरोप लगाएका छन्। चिकित्सकहरूका अनुसार सो घटनाले अस्पतालको शान्त वातावरण विथोलिएको छ र उनीहरू आफूहरू असुरक्षित महसुस गरिरहेका छन्।
घटनापछि चिकित्सकहरूले संयुक्त रूपमा प्रेस विज्ञप्ति जारी गर्दै अस्पताल जस्तो संवेदनशील क्षेत्रमा यस्ता प्रकारका आक्रमणहरू दुःखद् रहेको बताएका छन्। विज्ञप्तिमा दोषीमाथि कडा कारबाहीको माग गरिएको छ, साथै भविष्यमा यस्ता घटना दोहोरिन नदिन शान्ति सुरक्षा सुनिश्चित गर्न प्रशासनको ध्यानाकर्षण गराइएको छ। विज्ञप्तिमा चिकित्सकसहित अन्य अस्पताल कर्मचारीहरूको पनि हस्ताक्षर गरिएको छ।
सेवा ठप्प भएपछि उपचारका लागि विभिन्न गाउँबाट आएका बिरामीहरू समस्यामा परेका छन्। ओपीडी कक्ष बन्द छ भने चिकित्सकहरूको कार्यकक्ष पनि सिल गरिएको छ। अस्पतालको नियमित सेवा अवरुद्ध हुँदा सर्वसाधारणलाई ठूलो कठिनाइ भएको छ।
यता, जिल्ला प्रशासन कार्यालय सिरहाका प्रमुख जिल्ला अधिकारी विश्व प्रकाश अर्यालले भने ओपीडी सेवा ठप्प भएकोबारे आफूलाई जानकारी नभएको प्रतिक्रिया दिएका छन्।
