लहान १७ असार ।लहान नगरपालिकाका उपप्रमुख रामचलितर महतोले आफूले कुनै सुन पसलबाट सुन उधारोमा नलिएको स्पष्ट पारेका छन्। उनले आफूमाथि लगाइएको आरोप झूठो भएको र नगरप्रमुख महेश चौधरीले बदनाम गर्न षड्यन्त्र गरेको दाबी गरेका छन्।
विकास ट्रेडर्स नामको सुन पसलले लहान नगरपालिकामा उजुरी दर्ता गराउँदै उपमेयर महतोले दुई लाख ५१ हजार ४३० रुपैयाँ बराबरको सुन उधारोमा लिएको तर अहिलेसम्म रकम नतिरेको दाबी गरेको छ। तर महतोले भनेका छन्, मैले कसैबाट सुन लिएको छैन, ती सबै आरोप झूठा हुन् र राजनीतिक प्रतिशोधका कारण लगाइएका हुन्।
महतोले आरोप लगाए कि नगरप्रमुख चौधरीकै इसारामा आफूलाई फसाउन सुन पसलधनीलाई प्रयोग गरिएको हो। यदि मैले साँच्चै सुन लिएको छु भने प्रमाण देखाउनुहोस्, नत्र मेरो चरित्र हत्या गर्ने अधिकार कसैलाई छैन, उनले भने।
उनले यस्तो उजुरी नगरप्रमुखकै निर्देशनमा दर्ता भएको पनि बताए। फेसबुकमा सार्वजनिक भएको उजुरीमा मेयर चौधरीले उक्त उजुरीलाई बोर्ड बैठकमा पेश गर्न भनेको उल्लेख छ।
महतोले भने, नगर प्रमुख जस्तो जिम्मेवार पदमा बसेको व्यक्तिले सबैलाई समेटेर नगरको विकासमा लाग्नुपर्ने हो। तर चौधरीले व्यक्तिगत रिसइबीका आधारमा अधिकारको दुरुपयोग गरिरहेका छन्।
यो विषयमा स्थानीय बुद्धिजीवी, नागरिक समाज र विभिन्न पार्टीका प्रतिनिधिहरूले पनि चिन्ता व्यक्त गरेका छन्। एक नेताले भने, जनताको काम गर्नु पर्ने मेयर आफैंले झगडा बढाउने काम गर्नु राम्रो होइन।
स्थानीयबासीहरूले प्रमुख र उपप्रमुख दुवैलाई मिलेर काम गर्न आग्रह गरेका छन्। उनीहरूको भनाइ छ — जनताले सेवा र विकास चाहन्छन्, झगडा र राजनीतिक बदला होइन।
