सिरहा २३ असार । सिरहाको गोलबजार नगरपालिका–७, चोहर्वास्थित जनता नमूना माध्यमिक विद्यालयका शिक्षक हरि श्रेष्ठमाथि १३ र ८ वर्षीया छात्रामाथि यौन दुर्व्यवहार गरेको गम्भीर आरोप लागेको छ।
विद्यालयमा पटक–पटक गुनासो गर्दा पनि कुनै सुनुवाइ नभएको भन्दै आक्रोशित अभिभावक र स्थानीयले विद्यालयमा तोडफोड र प्रदर्शन गरेका हुन्।
शिक्षक श्रेष्ठले कक्षामा संवेदनशील अंग छुने, अश्लील कुरा गर्ने गरेको आरोप छ। प्रारम्भिक गुनासो शिक्षिका रञ्जु सिंहसमक्ष राखिए पनि प्रधानाध्यापक ब्रह्मदेव प्रसाद सिंह र विद्यालय व्यवस्थापन समिति अध्यक्ष रामकुमार महतोले गम्भीरता नदेखाई उल्टै ढाकछोप गर्न खोजेको पीडित पक्षको भनाइ छ।
स्थानीयका अनुसार दुर्व्यवहारमा पर्ने छात्रा १० जना भन्दा बढी हुन सक्ने शंका गरिएको छ। श्रेष्ठ एमाले नेता एवं सांसद लीलानाथ श्रेष्ठका नातेदार भएकोले उनीमाथि कारबाही प्रभावित भएको आशंका अभिभावकले व्यक्त गरेका छन्।
घटना सार्वजनिक भएपछि गोलबजार प्रहरीले श्रेष्ठलाई नियन्त्रणमा लिई अनुसन्धान अघि बढाएको छ। पीडित चार छात्राको स्वास्थ्य परीक्षण प्रादेशिक अस्पताल सिरहामा गरिएको छ।
विद्यार्थीहरू पनि विरोध प्रदर्शनको तयारीमा छन् भने अभिभावकले प्रधानाध्यापक सिंहलाई बर्खास्त गर्न र श्रेष्ठमाथि कडा कानुनी कारबाही गर्न माग गरेका छन्।
