विराटनगर ३१ असार । मोरङको बूढीगंगा गाउँपालिका–६ स्थित सुनसरी–मोरङ सिँचाइ आयोजनाको नहर छेउको झाडीमा एक युवतीको सडेको अवस्थामा शव फेला परेको छ। शनिबार साँझ करिब ४ बजे फेला परेको उक्त शवको अवस्था भयावह रहेको प्रहरीले जनाएको छ।
अनुहार र शरीरका विभिन्न भागहरूमा किरा लागेको र युवती नग्न अवस्थामा फेला परेकीले घटनामा बलात्कारपछि हत्या भएको आशंका गरिएको छ। कम्मरदेखि तलको भागमा कपडा नलागाएको अवस्थामा भेटिएको शवसँगै चप्पल, चिम्टी र पाइन्ट छुट्टै अवस्थामा फेला परेको छ। यसले घटनालाई योजनाबद्ध ढंगले ललाइफकाई हत्या गरिएको संकेत दिएको प्रहरीले बताएको छ।
मृतकको पहिचान अहिलेसम्म खुलेको छैन। मोरङ प्रहरीकी डीएसपी कोपिला चुँडालका अनुसार युवतीको अनुहार अत्यन्त क्षतविक्षत अवस्थामा रहेकाले पहिचानमा कठिनाइ भएको हो। ‘हालसम्म कसैले हराएको भनेर पनि जानकारी दिएको छैन,’ उनले भनिन्।
प्रहरीले मृतक स्थानीय वा वरपरको क्षेत्रमा डेरा गरी बस्ने हुनसक्ने अनुमान गरेको छ। शवलाई पोस्टमार्टमका लागि कोशी अस्पताल, विराटनगर पठाइएको छ। प्रारम्भिक अनुमान अनुसार मृतक युवतीको उमेर २० वर्षभन्दा कम हुनसक्छ।
हालसम्मका प्रमाणले घटनामा बलात्कारको सम्भावना देखिए पनि अनुसन्धानमै पुष्टि हुन बाँकी रहेको प्रहरी स्रोतले जनाएको छ। ‘शंकाको भरमा निष्कर्षमा पुग्न मिल्दैन,’ स्रोतले भन्यो, ‘सबै कोणबाट अनुसन्धान भइरहेको छ।’
घटनापछि आसपासका स्थानीयहरू त्रसित बनेका छन्। घटनाले आपराधिक गतिविधिहरूप्रति गम्भीर सावधानी आवश्यक भएको सन्देश दिएको छ।
