१० लाख बढी नगदसहित भारतीय नागरिक लहानबाट पक्राउ

लहान  ।स्रोत नखुलेको १० लाख नगदसहित भारतीय नागरिक अस्पताल चोक नजिकबाट प्रहरीले पक्राउ गरिएको छ ।सिरहाको लहान नगरपालिका वडा नम्बर ३ को अस्पताल चोक नजिकै आज बिहान सशस्त्र प्रहरीले स्रोत नखुलेको रु १० लाख एक हजार ६९५ नगदसहित एक भारतीय नागरिकलाई पक्राउ गरेको छ। पक्राउ पर्ने व्यक्ति भारतको मधुवनी जिल्लास्थित लौकाहा बजार निवासी अन्दाजी २४ वर्षीय राहुल कुमार रहेका छन्।

सशस्त्र प्रहरी बल, नेपाल नं. ७ गण सिरहाका गणपति, सशस्त्र प्रहरी उपरीक्षक नरेश भण्डारीका अनुसार बिहान करिब ९ः३० बजे सुरक्षा वेश क्याम्प लहानबाट खटिएको चेक प्वाइन्ट टोलीले यात्रुवाहक सवारी जाँच गर्ने क्रममा इनरुवाबाट लहानतर्फ आउँदै गरेको बसमा सवार राहुल कुमारलाई नियन्त्रणमा लिएको हो।

पक्राउ परेका राहुल कुमारलाई उक्त नगदसहित भन्सार कार्यालयमा बुझाउने प्रक्रिया अघि बढाइएको प्रहरीले जानकारी दिएको छ।