लहान । सिरहाको नवराजपुर गाउँपालिकामा लागुऔषध ओसारपसारमा संलग्न एक भारतीय नागरिकलाई प्रहरीले गोली प्रहार गरी पक्राउ गरेको छ। झाँझपट्टीबाट खटिएको प्रहरी टोलीले गोप्य सूचनाको आधारमा नवराजपुर गाउँपालिका–४ कुसण्डी जाने बाटोमा लागुऔषध ओसारपसार भइरहेको जानकारी पाएपछि बिहीबार दिउँसो करिब ३:४५ बजे भारतीय नम्बर प्लेटको मोटरसाइकललाई रोक्न खोज्दा उक्त व्यक्ति फरार हुन खोजेपछि प्रहरी बाध्य भई गोली चलाएको हो।
इप्रका झाँझपट्टी, जिल्ला प्रहरी कार्यालय सिरहा र लागुऔषध नियन्त्रण ब्युरो गोलबजारबाट खटिएको संयुक्त टोलीले BR 32 M 7338 नम्बरको मोटरसाइकलमा भारतबाट नेपाल प्रवेश गर्दै गरेका तस्करलाई रोक्न खोज्दा उनले नमानेपछि Type 77 मोडेलको पेस्तोलबाट एक राउण्ड गोली प्रहार गरी नियन्त्रणमा लिएको प्रहरीले जनाएको छ।
पक्राउ परेका व्यक्ति भारतको बिहार राज्य अन्तर्गत मधुबनी जिल्लाको बिरपुर ग्रामपंचायत–९ का ३८ वर्षीय श्याम सुन्दर पासवान रहेको खुलाइएको छ। उनको साथबाट करिब ५० ग्राम खैरो हिरोइन समेत बरामद गरिएको छ।
पासवानलाई मोटरसाइकल र लागुऔषधसहित थप अनुसन्धानका लागि इलाका प्रहरी कार्यालय महेशपुरपतारी पठाइएको छ। प्रहरीले भारत–नेपाल सीमामा सक्रिय लागुऔषध तस्करीमा संलग्न गिरोहमाथि निगरानी तीव्र बनाइएको र यस्ता अवैध गतिविधिमाथि कडा कारबाही जारी राखिने जनाएको छ।
