लहान ।करिब नौ करोड रुपैयाँ लागतमा निर्माण सम्पन्न ‘खुट्टी सिँचाइ नहर’ चार वर्षपछि सञ्चालनमा ल्याउने तयारी थालिएको छ। बजेट अभाव, स्थानीय तहसँग समन्वयको कमी र अन्य विवादका कारण लामो समयदेखि थन्किएको यो आयोजना अब पुनः सञ्चालनमा आउने भएपछि किसानमा आशाको किरण देखिएको छ।
मधेश प्रदेश सरकारले चालु आर्थिक वर्षमा उक्त नहरको सुधार र सफाइका लागि १५ लाख रुपैयाँ बजेट विनियोजन गरेको छ। जलस्रोत तथा सिँचाइ विकास डिभिजन कार्यालय, सिरहाका अनुसार यही बजेटबाट नहर सफा गरी सञ्चालन गर्ने प्रक्रिया तीव्र गतिमा अघि बढाइएको हो।
आज सिँचाइ आयोजनाको स्थलगत अनुगमनका लागि मधेश प्रदेशसभा सदस्य राजेन्द्रप्रसाद चौधरी, जिल्ला समन्वय समिति सभापति दिनेश महतो, प्रमुख जिल्ला अधिकारी विश्वप्रकाश अर्याल, जलस्रोत तथा सिँचाइ विकास डिभिजन कार्यालयका प्रमुख हस्मत अन्सारी, लहान इलाका प्रशासन प्रमुख गोकर्णराज सुयल तथा सुरक्षा निकायका उच्च अधिकारीसहितको टोली पुगेको थियो।
अनुगमनपछि सरोकारवाला सबै पक्षबीच छलफल गरी छिट्टै नहर सञ्चालन गर्ने सहमति जुटाइएको डिभिजन प्रमुख अन्सारीले जानकारी दिए। “विगत तीन वर्षदेखि बजेट नपाउँदा काम अगाडि बढ्न सकेको थिएन,” उनले भने, “आजको स्थलगत अनुगमनको उद्देश्य अवरोधको पहिचान गरी समाधान खोज्नु नै हो। अब यो आयोजना ‘फास्ट ट्र्याक’मा अघि बढ्नेछ।”
करीब ९३५ बिघा खेतीयोग्य जमिनमा सिँचाइ सुविधा पुर्याउने लक्ष्यसहित निर्माण गरिएको यो नहर लहान, सखुवानान्करकट्टी, भगवानपुर र लक्ष्मीपुर पतारीका किसानहरूका लागि महत्वपूर्ण मानिन्छ।
‘हेडवक्र्स’ निर्माणसँगै उत्साहित बनेका किसानहरू लामो समयसम्म नहर सञ्चालन नहुँदा निराश बनेका थिए। निरन्तर बेवास्ता भएपछि किसानहरूले संघर्ष समिति गठन गरी दबाब सिर्जना गरेपछि मात्र पुनः सञ्चालनको प्रक्रिया सुरु भएको हो।
