काठमाडौं । राजधानी काठमाडौंमा भइरहेको ‘जेन-जी’ युवाहरूको आन्दोलन शनिबार हिंसात्मक रूप लिएपछि सुरक्षा निकायसँगको झडपमा कम्तीमा १४ जनाले ज्यान गुमाएका छन्।
प्रदर्शन नियन्त्रणमा लिन प्रहरीले पानीको फोहरा, अश्रुग्याससहित गोली प्रहार गरेपछि बानेश्वर क्षेत्र र आसपास तनावग्रस्त बनेको हो।
अस्पताल स्रोतका अनुसार अहिलेसम्म ७ जनाको ट्रमा सेन्टरमा, ३ जनाको एभरेस्ट अस्पतालमा, २ जनाको सिभिल अस्पतालमा र १–१ जनाको त्रिवि शिक्षण अस्पताल तथा केएमसीमा मृत्यु भएको छ।
विभिन्न अस्पतालमा दुई सयभन्दा बढी घाइतेको उपचार भइरहेको छ। सिभिलमा मात्र करिब १०० जना, ट्रमा सेन्टरमा ५०, केएमसीमा ३५, एभरेस्टमा २०, वीरमा ७ र पाटन अस्पतालमा ४ जना भर्ना भएको जनाइएको छ।
एभरेस्ट अस्पतालका अधिकारी अनिल अधिकारीका अनुसार त्यहाँ ४ जना गम्भीर अवस्थामा छन्। त्यस्तै, ट्रमा सेन्टरका डा. दीपेन्द्र पाण्डेका भनाइमा त्यहाँ १० जना गम्भीर घाइते छन्, जसको टाउको र छातीमा गोली लागेको छ।
सरकारले लगाएको सामाजिक सञ्जाल प्रतिबन्ध र बढ्दो भ्रष्टाचारविरुद्ध असन्तुष्ट ‘जेन-जी’ पुस्ता काठमाडौंसहित मुलुकका विभिन्न प्रमुख शहरमा सडकमा उत्रिएको हो।
