इटहरी । जेन-जी’ आन्दोलनको लहर राजधानीपछि इटहरीमा पनि हिंसात्मक बनेको छ। प्रदर्शनकारी र सुरक्षाकर्मीबीच झडप चर्किँदा प्रहरीले गोली चलाउँदा एक जनाको मृत्यु भएको पुष्टि भएको छ। मृतकको पहिचान भने अझै खुलेको छैन।
आन्दोलन नियन्त्रण गर्न प्रशासनले इटहरीका संवेदनशील क्षेत्रलाई लक्षित गर्दै अनिश्चितकालीन कर्फ्यु आदेश जारी गरेको छ। सुनसरीका प्रमुख जिल्ला अधिकारी धर्मेन्द्रकुमार मिश्रका अनुसार पूर्वमा मिलनचोकदेखि अख्तियार कार्यालय, पश्चिममा कलङ्की चोक, उत्तरमा हलगडा र दक्षिणमा साथी पेट्रोल पम्प हुँदै बसपार्कसम्मको क्षेत्र कर्फ्युको दायरामा परेको छ।
आक्रमणपछि प्रशासन कडाइमा
आन्दोलनकारीहरूले इटहरी उपमहानगर भित्र पसेर तोडफोड र आगजनी गरेपछि स्थिति नियन्त्रणमा लिन प्रशासनले बल प्रयोग गरेको हो। आक्रमण बढेपछि कर्मचारी र जनप्रतिनिधिहरूले कार्यालय छाडेर ज्यान जोगाउन बाध्य भएको स्थानीय स्रोतको भनाइ छ।
सामाजिक सञ्जाल प्रतिबन्ध र बढ्दो भ्रष्टाचारविरुद्ध असन्तुष्ट ‘जेन-जी’ पुस्ताले काठमाडौंसहित विभिन्न शहरमा आन्दोलन चर्काइरहेका छन्। इटहरीमा भने आन्दोलन हिंसात्मक मोड लिँदा मृत्युसँगै स्थानीयमा थप त्रास फैलिएको छ।
