लहान २ पुष ।‘सप्तरीको सुरुङ्गामा छठ रातमै किशोरी अपहरण शैलीमा बेपत्ता, पीडितलाई उल्टै प्रहरीको हप्की धम्की, मुद्दा दर्तामा बिचौलियाको खेल– महिनौँपछि पनि आरोपी फरार, प्रहरी प्रशासनमाथि संरक्षण दिएको गम्भीर आरोप’ शीर्षकमा प्रकाशित/प्रसारित समाचार सामग्रीप्रति मेरो गम्भीर ध्यानाकर्षण भएको छ। उक्त समाचारमा उल्लेखित विषयवस्तुहरूप्रति मेरो देहायअनुसार बुँदागत खण्डन तथा प्रतिक्रिया रहेको हुँदा यसलाई सार्वजनिक रूपमा स्थान दिनुहुन अनुरोध गर्दछु।
देहायः
१) अपहरणसम्बन्धी दाबीबारे
प्रसारित समाचारमा ‘किशोरी अपहरण शैलीमा बेपत्ता’ भएको उल्लेख गरिएको छ, जुन तथ्यगत रूपमा भ्रामक र असत्य रहेको स्पष्ट पार्न चाहन्छु। वास्तविकता अनुसार सो घटनामा केटा–केटीबीच आपसी प्रेम सम्बन्ध रहेको र छठको रातमा दुवैको सहमतिमै शारीरिक सम्बन्ध कायम भएको तथ्य विभिन्न प्रमाणसहित सार्वजनिक भइसकेको छ। यसलाई ‘अपहरण शैलीमा बेपत्ता’ भन्नु सत्यसँग मेल खाँदैन र समाजमा विद्यमान प्रमाणहरूले पनि उक्त दाबीलाई अस्वीकार गर्छन्।
२) चरित्रहत्या र पत्रकारिता आचारसंहिताको उल्लङ्घनबारे
समाचार सामग्रीमा मेरो नाम उल्लेख गरी कुनै विषयवस्तुसँग जोडेर आरोप लगाउँदा, सम्बन्धित पक्षसँग एकपटक पनि धारणा नलिइएको, मेरो सामाजिक मर्यादा र प्रतिष्ठालाई गम्भीर क्षति पुग्ने गरी सामग्री प्रकाशन गरिएको छ। यसरी तथ्य पुष्टि नगरी, सम्बन्धित व्यक्तिको धारणा नलिई समाचार सम्प्रेषण गर्नु पत्रकारिताको आधारभूत सिद्धान्त र आचारसंहिताविपरीत रहेको मेरो ठहर छ।
३) दिनेश चौधरीको संलग्नताबारे
उक्त घटनामा दिनेश चौधरीको कुनै पनि प्रकारको संलग्नता नरहेको कुरा स्पष्ट भइसकेको छ। पछिल्लो समय प्रसारित समाचारहरूमा पनि यससम्बन्धी भूल सुधार भएको देखिन्छ। त्यसैले प्रारम्भिक समाचारमा नाम जोडिनु सरासर गलत रहेको स्पष्ट पार्दै, सो विषयमा औपचारिक खण्डन भएको जानकारी प्रेस काउन्सिल नेपालसमक्ष समेत गराइएको छ।
उपरोक्त कारणहरूका आधारमा भ्रामक, अप्रमाणित तथा चरित्रहत्या हुने गरी प्रकाशित समाचार सामग्रीप्रति मेरो यो खण्डन तथा प्रतिक्रिया यथोचित स्थानमा प्रकाशन गरिदिनुहुन हार्दिक अनुरोध गर्दछु।
