प्रदिप सिंह
लहान।गरिबी र अभावलाई चुनौती दिँदै एमबिबिएस छात्रवृत्तिमा नाम निकाल्न सफल भएका सिरहा जिल्ला, बरियारपट्टि गाउँपालिका–२, श्रीपुर गाउँ निवासी सत्यनारायण साफीको ‘डाक्टर’ बन्ने सपना पूरा गर्न सहयोगी हातहरू अगाडि आएका छन्।
मधुरी साफीका छोरा सत्यनारायण साफीले मधेसी दलित कोटाबाट पूर्ण एमबिबिएस छात्रवृत्तिमा नाम निकाल्दै मजदुरीबाट मेडिकल शिक्षासम्मको प्रेरणादायी यात्रा तय गरेका हुन्।
उद्योग वाणिज्य संघ लहानका अध्यक्ष विकास शारदाले आफ्नो जन्मदिनको अवसरमा सत्यनारायण साफीको अध्ययन खर्चका लागि ५ वर्षसम्म हरेक महिना रु. १० हजार सहयोग गर्ने घोषणा गर्नुभएको छ। यसअनुसार उहाँबाट कुल रु. ६ लाख सहयोग उपलब्ध हुनेछ।
यसैगरी, प्रदिप गुप्ता प्यानलको तर्फबाट थप रु. २५ हजार आर्थिक सहयोग प्रदान गरिएको छ।
छात्रवृत्तिले अध्ययन शुल्क निःशुल्क भए पनि आवास, शैक्षिक सामग्री र दैनिकी खर्चमा चुनौती रहेको अवस्थामा आएको यो सहयोगले साफीको शैक्षिक यात्रामा ठूलो राहत पुग्ने विश्वास गरिएको छ।
सहयोगप्रति कृतज्ञता व्यक्त गर्दै सत्यनारायण साफीले भने,“यो सहयोग केवल आर्थिक मात्र होइन, मप्रतिको भरोसा हो। म भविष्यमा समाजकै सेवामा आफूलाई समर्पित गर्नेछु।”
गरिबीले रोक्न नसकेको सत्यनारायण साफीको सफलता र उनलाई प्राप्त सहयोग अहिले धेरै युवाका लागि आशा र प्रेरणाको बलियो उदाहरण बनेको छ।
