महेश सिंह लहान ५ फागुन– मधेस जनविद्रोहमा सहिद भएका वीर सहिदहरूको स्मृतिमा राष्ट्रिय स्वतन्त्र पार्टीका वरिष्ठ नेता बालेन्द्र साहले सिरहाको लहानमा रहेको सहिद सालिकामा श्रद्धाञ्जली अर्पण गरेका छन्। माघ ५ गते मधेस बलिदान दिवसको अवसरमा लहान–१ स्थित मुख्य चौकमा रहेको सहिद सालिकामा उनले फूलमाला अर्पण गर्दै सहिदप्रति सम्मान प्रकट गरेका हुन्।
श्रद्धाञ्जली कार्यक्रममा रास्वपाका नेताहरू अमरेश सिंह, शिव यादव, पुरुषोत्तम यादव, अर्बिन्द मेहरा लगायतको उल्लेखनीय उपस्थिति रहेको थियो। सहिदप्रति श्रद्धाञ्जली अर्पण पश्चात नेता साह मधेस प्रदेशको राजधानी जनकपुरधाममा आयोजना हुन लागेको आमसभालाई सम्बोधन गर्न प्रस्थान गरेका थिए।
कार्यक्रमका क्रममा लहानमा बालेन्द्र साहका समर्थकहरूको ठूलो भीड उत्रिएको थियो। समर्थकहरूको उल्लेखनीय उपस्थितिका कारण केही समय लहान क्षेत्रको सुरक्षा व्यवस्थापनमा चुनौती उत्पन्न भएको प्रत्यक्षदर्शीहरूले बताएका छन्। उत्साहित समर्थकहरूको भीडलाई नियन्त्रण गर्न प्रहरी प्रशासनलाई कठिनाइ परेको बताइएको छ।
बलिदान दिवसको दिन मधेसी सहिदको धरोहर दाबी गर्ने विभिन्न मधेसी राजनीतिक दलका नेताहरू भने सहिद सालिकामा माला अर्पण गर्न पछाडि परेको स्थानीयको टिप्पणी छ। सोही कारण जनस्तरमा प्रश्नसमेत उठ्न थालेको देखिएको छ।
लहान मात्र नभई देशभर नै बालेन्द्र साहप्रति व्यापक जनसमर्थन देखिएको छ। सामाजिक सञ्जालदेखि सडकसम्म उनको लोकप्रियता र ‘क्रेज’ बढ्दो क्रममा रहेको विश्लेषकहरू बताउँछन्। लहानमा देखिएको जनउपस्थिति यसैको स्पष्ट उदाहरण भएको स्थानीयहरूको भनाइ छ।
मधेस बलिदान दिवसको अवसरमा आयोजित यस कार्यक्रमले मधेस आन्दोलनका सहिदहरूको योगदानलाई पुनः स्मरण गराउँदै राजनीतिक वृत्तमा नयाँ तरंग सिर्जना गरेको छ।
