सिरहा – फल्गुण २१ गते हुने प्रतिनिधि सभाको निर्वाचन अन्तर्गत सिरहाको निर्वाचन क्षेत्र नम्बर–२ मा नेपाली काङ्ग्रेसका उम्मेदवार रामचन्द्र यादवले आफू सधैं जनताको सच्चा सेवकका रूपमा काम गर्दै आएको बताएका छन्।
सिरहाको धनगढीमाई नगरपालिका–१२ मा आयोजित चुनावी भेटघाट कार्यक्रममा बोल्दै उम्मेदवार यादवले आफू निरन्तर जनताको सुख–दुःखमा साथ दिँदै आएको उल्लेख गर्दै संविधानको रक्षा र दिगो विकासका लागि काङ्ग्रेसलाई जिताउन आग्रह गरे। उहाँले धर्म, संस्कृति र राष्ट्रिय मूल्य–मान्यताको संरक्षण गर्ने पार्टी नेपाली काङ्ग्रेस नै भएको दाबी गर्दै जनतालाई विश्वास दिलाउनुभयो।
संविधान सभा सदस्यसमेत रहनु भएका यादव सिरहा–२ मा काङ्ग्रेसका बलिया उम्मेदवारका रूपमा देखिएका छन्। स्थानीय तहमा काङ्ग्रेसप्रति जनआकर्षण बढ्दै गएको र रुख छापमा मतदान गर्ने क्रेज दिनप्रतिदिन बढिरहेको स्थानीयको भनाइ छ।उम्मेदवार यादवले पार्टीको विरासत जोगाउँदै संगठन सुदृढीकरणमा निरन्तर सक्रिय रहँदै आएका छन्। सो क्षेत्रका अन्य दलको तुलनामा नेपाली काङ्ग्रेस नै बलियो अवस्थामा रहेको राजनीतिक विश्लेषकहरूको आकलन छ।चुनावी सभामा पूर्व सांसद नरेश यादव, पार्टी नेता तपेश्वर महतो, पंचलाल महतो लगायतका नेताहरूले उम्मेदवार यादवको समर्थनमा मत माग्दै निरन्तर बैठक तथा गोष्ठी गरिरहेका छन्। यसै क्रममा एमाले, जसपा र माओवादी परित्याग गरी दर्जनौं कार्यकर्ता नेपाली काङ्ग्रेसमा प्रवेश गरेको बताइएको छ।
