लहान १८ फागुन ।सिरहाको गोलबजार नगरपालिका–३ जमनटोकी नजिक आइतबार राति पूर्व–पश्चिम राजमार्गमा बस र मोटरसाइकल ठोक्किँदा २ युवकको मृत्यु भएको छ भने एक किशोर सख्त घाइते भएका छन्।
घटनाबारे सुधन केसीले जानकारी दिए। उनका अनुसार दुर्घटनामा धनगढीमाई नगरपालिका–८ का ३७ वर्षीय सन्तोष महतो र २० वर्षीय अमन रायको स्थानीय स्वास्थ्य संस्थामा उपचारको क्रममा मृत्यु भएको हो। मोटरसाइकलमा सवार १७ वर्षीय धिरज मण्डल सख्त घाइते भएका छन् र अहिले विराटनगरमा उपचाररत छन्।
प्रहरीका अनुसार गोलबजारबाट पूर्वतर्फ आउँदै गरेको स.५प.४७५९ नम्बरको मोटरसाइकल र धरानबाट भैरहवातर्फ जाँदै गरेको लु२ख १०८५ नम्बरको बस ठोक्किएका थिए। मृतक र घाइते तीनै जना एउटै मोटरसाइकलमा सवार थिए।
घाइते मण्डलको उपचार विराटनगरमा भइरहेको छ भने मृतकको शव पोष्टमार्टमका लागि लहानस्थित रामकुमार उमाप्रसाद प्रदेशिक अस्पतालमा राखिएको छ।
बस र चालक प्रहरीले नियन्त्रणमा लिएका छन्। इलाका प्रहरी कार्यालय गोलबजारले घटनाबारे थप अनुसन्धान सुरु गरेको जनाएको छ।
