झापा । झापाको बिर्तामोड नगरपालिका–२ रामचोकमा बिहीबार बिहान क्यान्टिनमा आगलागी हुँदा एक वृद्धको जलेर मृत्यु भएको छ।
मृत्यु हुनेमा गौरीगञ्ज गाउँपालिका–२ का ६५ वर्षीय रुद्रबहादुर तामाङ रहेका छन्। उनी बिर्तामोड–४ का रवी राजवंशीले सञ्चालन गर्दै आएको बडी ग्यारेजको क्यान्टिनमा काम गर्थे।
इलाका प्रहरी कार्यालय अनारमनीका अनुसार बिहीबार बिहान करिब ४:१० बजे विद्युत् सर्ट भएर आगलागी भएको थियो। प्रहरी, स्थानीय बासिन्दा र दमकलको सहयोगमा बिहान ४:३० बजे आगो नियन्त्रणमा लिइएको थियो। त्यसपछि गरिएको अनुसन्धानका क्रममा क्यान्टिनभित्र तामाङको शव फेला परेको प्रहरीले जनाएको छ।
आगलागीबाट क्यान्टिनमा रहेका भाँडावर्तन, लत्ताकपडा, नगद एक लाख रुपैयाँ र तीनवटा खसीबाख्रा जलेर नष्ट भएका छन्। क्यान्टिनतर्फ मात्रै करिब तीन लाख रुपैयाँ बराबरको क्षति भएको प्रारम्भिक अनुमान छ।
यस्तै, नजिकै रहेको राजेन्द्र अग्रवालको मार्बल तथा टायलको गोदाममा समेत आगो सल्किएको थियो। आगो निभाउने क्रममा गोदाममा रहेका २० देखि २५ बोरा सिमेन्ट पानीले भिज्दा करिब २५ हजार रुपैयाँ बराबरको क्षति भएको जनाइएको छ।
घटनामा भएको थप क्षतिको विवरण संकलन तथा आवश्यक अनुसन्धान भइरहेको इलाका प्रहरी कार्यालय अनारमनीले जनाएको छ।
