काठमाडौं ,श्रावण २ । प्रधानसेनापति प्रभुराम शर्मा आगामी साता १५ दिने अष्ट्रेलिया भ्रमणमा जाने भएका छन्। इन्डो–प्यासफिक क्षेत्रका सैनिक प्रमुखको वार्षिक सम्मेलनमा भाग लिन उनी त्यसतर्फ जाने भएका हुन्।
अमेरिकी सेनाको पहलमा साउन ९ देखि ११ सम्म अष्ट्रलियामा हुने ‘एनुअल चिफ्स अफ डिफेन्स कन्फ्रेन्स’मा इन्डो–प्यासफिक क्षेत्रका सैनिक प्रमुख सहभागी हुँदैछन् । उक्त सम्मेलनमा प्रधानसेनापति शर्माले पनि भाग लिने कार्यतालिका रहेको छ। सम्मेलनमा सहभागी हुनका लागि शर्मा साउन ७ गते अष्ट्रेलिया प्रस्थान गर्नेछन्।
मन्त्रिपरिषद् बैठकले उनको अष्ट्रेलिया भ्रमण स्वीकृत गरिसकेको छ। सैनिक मुख्यालय जग्गीअड्डाको प्रस्ताव रक्षा मन्त्रालय हुँदै अघिल्लो साता मन्त्रिपरिषद् पुगेको थियो। सैनिक प्रवक्ता नारायण सिलवालले उक्त कन्फ्रेन्स हरेक बर्ष फरक-फरक देशमा हुने नियमअनुसार यसपाली अष्ट्रेलियाले आयोजना गर्न लागेको बताए।
प्रधानसेनापति साउन ११ गतेसम्म कन्फ्रेन्समा सहभागी भएपछि थप ११ दिन अष्ट्रेलियामै रहनेछन् । साउन १२ पछि उनी अष्ट्रेलियामै पारिवारिक भेटघाटमा रहने छन्। सोहीअनुरुप उनको बिदा स्वीकृत भएको छ। प्रधानसेनापति शर्मा साउन २२ गते स्वदेश फर्किने कार्यक्रम छ।
अमेरिकी सेनाको इन्डो–प्यासिफिक कमाण्डको पहलमा उक्त सम्मेलन आयोजना हुन लागेको हो। सम्मेलनमा अमेरिकी सेनाका वरिष्ठ अधिकारी सहभागी हुनेछन्। भूराजनीतिक र सामरिक अवस्थितिका कारण अमेरिकाले अस्ट्रेलियालाई इन्डो–प्यासिफिक क्षेत्रको महत्वपूर्ण मुलुक मान्दै आएको छ।
