लहान ।सिरहाको धनगढीमाई नगरपालिका वडा नम्बर १० स्थित इन्द्रेणी पाठशालामा आज विधिवत रूपमा विद्यार्थीहरूबीच रंगोली प्रतियोगिता सम्पन्न भएको छ। उक्त प्रतियोगितामा विभिन्न कक्षाका विद्यार्थीहरूले उत्साहपूर्वक सहभागी जनाए र सिर्जनात्मक ढंगले सुन्दर रंगोली प्रस्तुत गरे।
विद्यालयका शिक्षक सञ्जय चौधरीले प्रतियोगिताबारे बोल्दै हरेक कक्षामा बनेका रंगोलीहरू अवलोकन गरी उत्कृष्ट रंगोली बनाउने विद्यार्थीहरूलाई सम्मान गरिने जानकारी दिए। यो प्रतियोगिता विद्यार्थीहरूको सिर्जनात्मक क्षमताको अभिवृद्धिका साथै सांस्कृतिक चेतना बढाउन सहयोगी हुने विश्वास लिइएको छ।
इन्द्रेणी पाठशाला धनगढीमाई नगरपालिका क्षेत्रका अभिभावकहरूको मन जित्न सफल शैक्षिक संस्था मानिन्छ। हरेक वर्ष यस प्रकारका प्रतियोगिताहरूको आयोजना गरी विद्यार्थीहरूलाई सृजनशीलता र प्रतिस्पर्धात्मक भावना विकास गराउने परम्परालाई यस विद्यालयले निरन्तरता दिँदै आएको छ।
आज सयौं विद्यार्थीहरूले रमाइलो र हर्षोल्लासपूर्ण वातावरणमा कार्यक्रम सम्पन्न गरे, जसले विद्यालय परिसरलाई रंगीन बनाएको थियो। कार्यक्रमपछि विद्यार्थीहरूले आफ्नो मेहनत र सिर्जनालाई शिक्षकहरूबाट प्रशंसा पाउँदा निकै उत्साहित देखिन्थे प्रधानाध्यापक मुक्तिलाल सहनीले बताए।
