लहान।सिरहा जिल्लाको लहान नगरपालिका वडा नं १ स्थित तरकारी बजारमा अहिले चाडपर्वको अवसरमा किनमेल गर्न आएका मानिसहरूको भीड लागेको छ। विभिन्न परिकारका लागि आवश्यक मिठाई, फूलमाला, र फलफूलका साथै शिवपत्री फूलदेखि धार्मिक कार्यमा प्रयोग हुने सामग्रीहरूको खरिद बिक्रीले बजारमा चहलपहल बढाएको छ।
एकजना फूल व्यापारीले भने, “यो चाडपर्वको समयमा हामीलाई राम्रो आम्दानी हुन्छ। फूल बेचेर नै हामी हाम्रो परिवार पाल्छौं।” शिवपत्री फूलको माग विशेष गरेर बढेको छ, जसको कारण अहिले प्रति केजी ५०० रुपैयाँको दरले बिक्री भइरहेको छ। यस्तै, फलफूलमा स्याउको मूल्य प्रति केजी २०० देखि २५० रुपैयाँसम्म पुगेको छ।
मिठाई परिकारमा बुनिया पनि लोकप्रिय बनेको छ, जसको मूल्य प्रति केजी २४० रुपैयाँमा बिक्री भइरहेको छ। बजारका व्यापारीहरू समान बेच्न व्यस्त छन् भने किनमेल गर्न आएका ग्राहकहरू आवश्यक सामानहरूको छनोटमा रमाइरहेका छन्।
व्यापारीहरूका अनुसार, यस्ता चाडपर्वमा व्यापार राम्रो हुने भएकाले यसले उनीहरूको आम्दानीमा वृद्धि गर्छ। बजारमा देखिएको यो उत्साहले सबैलाई चाडपर्वको माहोलमा झनै रौनक थपेको छ।
