महेश सिंह सिरहा- सिरहाको धनगढीमाई नगरपालिका–८ मा नवनिर्मित वडाकार्यालय भवनको उद्घाटन गरिएको छ। जनमत पार्टीका केन्द्रिय अध्यक्ष डा. सिके राउत र मधेस प्रदेशका मुख्यमन्त्री सतिश कुमार सिंहले आइतबार संयुक्त रूपमा उक्त भवनको उद्घाटन गरेका हुन्।
वर्षौंदेखि आफ्नै भवन अभावमा वडासम्बन्धी कामकाजमा सास्ती खेप्दै आएका स्थानीयवासी अब सुविधा सम्पन्न भवनबाट सेवा पाउने भएका छन्। वडाध्यक्ष राम भरोस महतोले आफ्नै पहलमा भवन निर्माण सम्पन्न भएको जानकारी दिए। “आम नागरिकलाई सुविधा दिन सक्ने संरचना बनेकोमा खुशी लागेको छ,” उनले भने।
उक्त भवन निर्माणका लागि १ करोड रुपैयाँको योजना स्वीकृत भए पनि जम्मा १२ लाख रुपैयाँमै काम सम्पन्न गरिएको वडाध्यक्ष महतोले जानकारी दिए।
उद्घाटन कार्यक्रममा अध्यक्ष डा. राउतले जनमत पार्टीले जनताको शासन ल्याउन प्रतिवद्ध रहेको बताए। “जनता राज ल्याउने हाम्रो अठोट छ, ल्याएरै छाड्छौं,” उनले भने।
भवन उद्घाटन कार्यक्रममा प्रदेश सरकारका प्रतिनिधि, स्थानीय जनप्रतिनिधि र सर्वसाधारणको उपस्थिति रहेको थियो।
