कैलाली २२ चैत । जनक शिक्षा सामग्री केन्द्र को धनगढीस्थित प्रादेशिक कार्यालयले आगामी शैक्षिक सत्र २०८३ का लागि सुदूरपश्चिम प्रदेशभर हालसम्म ३ लाख १ हजार विद्यालयस्तरीय पाठ्यपुस्तक बिक्री तथा वितरण गरेको छ।
कार्यालय प्रमुख निर्मल कुमार यादवका अनुसार प्रदेशका नौवटै जिल्लामा विभिन्न पुस्तक विक्रेतामार्फत पाठ्यपुस्तक वितरण भइरहेको छ। हालसम्म पाठ्यपुस्तक बिक्रीबाट ३ करोड ७४ लाख रुपैयाँभन्दा बढी आम्दानी भएको उहाँले जानकारी दिनुभयो।
बाजुरा, दार्चुला, अछाम र बाजहाङजस्ता पहाडी जिल्लामा पाठ्यपुस्तक ढुवानी भइसकेको छ भने वैशाख १ गतेसम्म सबै जिल्लामा पाठ्यपुस्तक पुर्याउने लक्ष्य राखिएको छ।
चैत १७ गतेदेखि वितरण सुरु गरिएको पाठ्यपुस्तक आगामी शैक्षिक सत्रमा १६ लाख ५० हजारभन्दा बढी बिक्री गर्ने लक्ष्य रहेको कार्यालयले जनाएको छ। “हामी दुर्गम क्षेत्रमा पुस्तक पठाउने काममा छौं, शैक्षिक सत्र सुरु हुनुअघि सबै जिल्लामा समयमै पुर्याउनेछौं,” यादवले भन्नुभयो।
यस वर्ष नयाँ शैक्षिक सत्र वैशाख १५ गतेदेखि सुरु हुँदैछ। पाठ्यपुस्तक अभाव नरहेको र सबै सामुदायिक विद्यालयमा समयमै उपलब्ध गराइने पनि कार्यालयले जनाएको छ।
केन्द्रले कक्षा ३ देखि कक्षा १२ सम्मका पाठ्यपुस्तक उपलब्ध गराउँदै आएको छ। चालु शैक्षिक सत्रमा प्रदेशभर १६ लाख २९ हजार २६३ थान पाठ्यपुस्तक बिक्री भई २१ करोड ९३ लाख रुपैयाँभन्दा बढी कारोबार भएको केन्द्रले जनाएको छ।
