काठमाडौं।संस्कृति, पर्यटन तथा नागरिक उड्डयन मन्त्रालयले देशका तारे होटलहरूमा वातावरण संरक्षण र दिगो पर्यटनलाई प्रोत्साहन गर्न नयाँ पहलका रूपमा प्लास्टिकजन्य बोतलको प्रयोगमा रोक लगाउने निर्णय गरेको छ। यो निर्णयले प्लास्टिकको अत्यधिक प्रयोगबाट हुने वातावरणीय क्षति र स्वास्थ्यमा पर्ने नकारात्मक असरलाई कम गर्ने उद्देश्य राखेको छ।
पर्यटन विभागले चार तारे, पाँच तारे, पाँच तारे डिलक्स होटलहरू र उच्च स्तरका रिसोर्टहरूमा प्लास्टिकजन्य बोतलमा पेय पदार्थ वितरणमा रोक लगाएको हो। विभागले प्लास्टिकको बोतलमा आउने पानीको सट्टा काँच वा धातुका भाँडामा पानी उपलब्ध गराउन निर्देशन दिएको छ। यो नियम लागू भएपछि यी होटल र रिसोर्टहरूले अब काँचका बोतल, धातुका भाँडा वा अन्य पुन: प्रयोगयोग्य विकल्पहरू प्रयोग गर्नुपर्नेछ।
महानिर्देशक डा. नारायण रेग्मीका अनुसार यो कदमले होटल तथा पर्यटन क्षेत्रमा प्लास्टिक प्रदूषणलाई नियन्त्रण गर्न महत्वपूर्ण योगदान गर्नेछ। प्लास्टिकजन्य बोतलको प्रयोगले मानव स्वास्थ्यमा समेत नकारात्मक प्रभाव पार्ने भएकाले यसलाई निषेध गरिएको हो। यसबाट होटल तथा रिसोर्टहरूको वातावरणमैत्री छवि पनि बढाउन सकिने विश्वास गरिएको छ।
सरकारको यो निर्णयले होटल तथा पर्यटन क्षेत्रमा वातावरणीय स्थायित्वतर्फको यात्रालाई थप गति दिने देखिएको छ। होटल व्यवसायीहरूले पनि वातावरण संरक्षणको यस पहललाई सकारात्मक रूपमा लिएको बताइरहेका छन्। धेरै होटलहरूले यसअघि नै प्लास्टिकको बोतलको सट्टा वैकल्पिक सामग्रीको प्रयोग गर्न थालेका थिए।
यो पहलले प्लास्टिक प्रदूषण नियन्त्रणमा मात्र नभई पर्यटन क्षेत्रलाई ‘हरित पर्यटन’ तर्फ लैजाने रणनीतिमा योगदान पुर्याउने अपेक्षा गरिएको छ। पर्यावरणमैत्री पर्यटनको प्रवर्द्धनसँगै पर्यटकहरूलाई पनि वातावरण संरक्षणमा आफ्नो भूमिका महत्वपूर्ण हुने अनुभूति गराउने सरकारको योजना हो।
