काठमाडौं: साफ महिला च्याम्पियनसिप फुटबलमा साविक विजेता बंगलादेशले सेमिफाइनलमा स्थान सुरक्षित गरेको छ। बुधबार त्रिपुरेश्वरस्थित दशरथ रंगशालामा भएको खेलमा बंगलादेशले भारतलाई ३–१ को अन्तरले हराउँदै समूह ‘ए’ को विजेता बन्न सफल भयो।
बंगलादेशले १९औं मिनेटमा अफेइदा खान्डाकेरको गोलबाट अग्रता लिएको थियो। त्यसपछि तोहुरा खातुनले २९औं र ४२औं मिनेटमा दुई गोल थप्दै पहिलो हाफमै बंगलादेशलाई ३–० को मजबुत स्थितिमा पुर्याइन्। भारतले पनि पहिलो हाफको ४३औं मिनेटमा बालादेवीको गोलबाट अन्तर घटाउन सफल भए तापनि दोस्रो हाफमा गोल फर्काउने थप प्रयास असफल रह्यो।
समूह ‘ए’ मा बंगलादेश ४ अंकसहित समूह विजेता बन्यो भने भारत ३ अंकका साथ उपविजेताको रुपमा सेमिफाइनलमा प्रवेश गर्यो। पाकिस्तान भने १ अंक मात्रै जुटाउँदै प्रतियोगिताबाट बाहिरियो।
साफ च्याम्पियनसिप अन्तर्गत बिहीबार समूह ‘बी’ का अन्तिम दुई खेलहरू हुनेछन्। पहिलो खेल भुटान र माल्दिभ्सबीच दिउँसो १:३० बजे हुनेछ भने अर्को खेलमा घरेलु टोली नेपालले साँझ ५:३० बजे श्रीलंकासँग प्रतिस्पर्धा गर्नेछ।
