लहान, १३ फाल्गुन। सिरहाको राजनीतिमा आज एउटा महत्वपूर्ण मोड आएको छ। नेपाली कांग्रेसका दिग्गज एवं वरिष्ठ नेता तथा सिरहा क्षेत्र नम्बर १ का पूर्व सभापति अक्षमित लाल चौधरी औपचारिक रूपमा राष्ट्रिय स्वतन्त्र पार्टी (रास्वपा) मा प्रवेश गर्नुभएको छ।
लामो समयदेखि कांग्रेस राजनीतिमा सक्रिय रहँदै आएका चौधरीको यो निर्णयले जिल्लाको राजनीतिक समीकरणमा ठूलो प्रभाव पार्ने देखिएको छ। स्रोतका अनुसार उहाँले पछिल्लो समय पार्टीभित्रको असन्तुष्टि र परिवर्तनको आवश्यकतालाई मध्यनजर गर्दै रास्वपा रोज्नुभएको हो।
उहाँलाई रास्वपाका सभापति रवि लामिछानेले पार्टीको ब्याज लगाई औपचारिक रूपमा पार्टीमा स्वागत गर्नुभएको हो। कार्यक्रममा स्थानीय नेता तथा कार्यकर्ताको उल्लेखनीय उपस्थिति रहेको थियो।
रास्वपाका जिल्ला नेताहरूले चौधरीको आगमनले पार्टीलाई थप मजबुत बनाउने विश्वास व्यक्त गरेका छन्। उता कांग्रेस वृत्तमा भने यसलाई ठूलो क्षतिको रूपमा हेरिएको छ।
सिरहामा आगामी राजनीतिक गतिविधि झनै रोचक र प्रतिस्पर्धात्मक बन्ने संकेत देखिएको छ।
