काठमाडौं — राष्ट्रिय परीक्षा बोर्डले कक्षा १२ को परीक्षाको नतिजा सार्वजनिक गरेको छ। सोमबार बसेको बोर्ड बैठकले औपचारिक निर्णय गर्दै नतिजा सार्वजनिक गरेको हो।
बोर्डका अनुसार परीक्षामा सहभागी विद्यार्थीमध्ये ६१.१७ प्रतिशत उत्तीर्ण भएका छन्। गत वर्ष मात्र ५२ प्रतिशत विद्यार्थी सफल भएका थिए। यस वर्षको नतिजा तुलनात्मक रूपमा सुधारिएको छ।
विद्यार्थीहरूले आफ्नो नतिजा बोर्डको वेबसाइट result.neb.gov.np, neb.gov.np र नेपाल टेलिकमको https://neb.ntc.net.np मार्फत हेर्न सक्नेछन्।
गत वैशाखमा सञ्चालन भएको परीक्षामा कुल ५ लाख ११ हजार परीक्षार्थी सहभागी भएका थिए। तीमध्ये ३ लाख ९५ हजार नियमित र १ लाख १५ हजार आंशिक परीक्षार्थी रहेका छन्। १ हजार ५ सय ९१ परीक्षा केन्द्रहरूबाट परीक्षा लिइएको थियो। जापानस्थित एभरेस्ट स्कुलका ३८ विद्यार्थी पनि सहभागी भएका थिए।
७७ जिल्लामध्ये मनाङबाट सबैभन्दा कम ४५ जना र काठमाडौंबाट सबैभन्दा धेरै ६८ हजार विद्यार्थीले परीक्षा दिएका थिए। काठमाडौंमा १६२ परीक्षा केन्द्र सञ्चालन गरिएको थियो भने मनाङ र मुस्ताङमा १/१ वटा केन्द्र तोकिएको थियो।
यस वर्षको परीक्षा शैक्षिक आन्दोलनका कारण वैशाख ११ मा हुने भनिएको परीक्षा १० दिन ढिला गरी जेठ २ गतेसम्म सम्पन्न गरिएको थियो। त्यसपछि उत्तरपुस्तिका परीक्षणको प्रक्रिया सुरु गरिएको थियो।
लेटर ग्रेडिङ निर्देशिका २०७८ अनुसार प्रत्येक विषयमा सैद्धान्तिकतर्फ न्यूनतम ३५ प्रतिशत अंक ल्याउन नसकेका विद्यार्थीलाई ननग्रेडिङ (NG) दिइन्छ।
