कत्ति दाम बढेछ
अनि पो सडकमा गाडीहरूको
अति जाम बढेछ
ग्यासको मूल्य बढ्या बढ्यै
तिर्नै गाह्रो भएछ
अनि पो रेस्टुराँ होटलमा भिड बडेर
छिर्नै गाह्रो भएछ!
भन्सार र सीमानाकामा
चेकजाँच धन्न बढेछ
अनि पो हिरोइन र सुनको लौरो
प्लेनमा टन्न चढेछ
कामै बेगर ६०१ सांसद
पाल्नै पर्ने भएछ
अनि पो राजस्व र कर बढाइ
जनता ढाल्नै पर्ने भएछ।
चोरी, हत्या, आतंक र
युवा बेरोजगारी ह्वात्तै बढेछ
अनि पो खाडी र युरोपबाट
रेमिट्यान्स स्वात्तै बढेछ
चेलीबेटी र बालबालिका किनबेचले
निर्यात बढ्ने भएछ
अनि पो मानव तस्करीको मुद्दाहरू
फाइलमा मात्र चढ्ने भएछ
मल नपाएर वर्षातमा
तालु बढ्ने भो किसानको
किताब नभएर परीक्षामा
आलु बढ्ने भो विद्यार्थीको
औषधि पाइँदैन फार्मेसीमा
मृत्युदर बढ्ने भो नेपालीको
ऋण आउँदैन धरौटीमा
प्रेसर बढ्ने भो व्यापारीको
तलब बडाउँदैछ सरकारले
भुँडी बढ्ने भो जागिरेको
भोकमरी बढ्दैछ दिनदिनै
हड्डी बढ्ने भो बेरोजगारेको
महङ्गी आकाशिएर हजुर
बादल छुन लाग्या छ
जनताको शीर निहुँरिएर हजुर
पाताल छुन लाग्या छ!
भ्रष्टाचार र घुसखोरीले चैँ
देशै खान लाग्या छ
सरकार, कानुन, प्रसासन खै
के हेरेर बस्या छ!
सक्दैनन् बोल्न सोझा जनता
मुखैभरि घाउ छ
नेता भनाउँदोको झन्
जनता छल्ने दाउ छ
दलालहरूको पाउ मोल्दै सब
माथि चढ्या चढ्यै छन्
त्यसैले त हरेक चिजको
भाउ बढ्या बढ्यै छन्।
