काठमाडौँ ।हाल देशभर पश्चिमी वायुको आंशिक प्रभाव रहेको छ भने कोशी, बागमती र गण्डकी प्रदेशको पहाडी क्षेत्रहरूमा स्थानीय वायुको आंशिक प्रभाव रहेको जल तथा मौसम पूर्वानुमान महाशाखाले जनाएको छ। महाशाखाले बुधबार बिहान जारी गरेको मौसम बुलेटिन अनुसार, देशका पहाडी क्षेत्रहरूमा आंशिकदेखि सामान्य बदली छ भने बाँकी भू-भागमा आंशिक बदलीदेखि मौसम मुख्यतः सफा रहेको छ।
बुधबार दिउँसोको लागि गरिएको पूर्वानुमानमा पनि देशका पहाडी भू-भागमा आंशिकदेखि सामान्य बदली रहनेछ भने बाँकी भू-भागमा आंशिक बदली रहनेछ, तर मौसम मुख्य रूपमा सफा रहनेछ। त्यस्तै, दिउँसोको समयमा पहाडी क्षेत्रहरूमा केही स्थानमा हल्का वर्षाको सम्भावना रहेको छ।
आज राति पनि देशका पहाडी भू-भागमा आंशिकदेखि साधारणतया बदलीको सम्भावना रहेको छ भने कोशी, गण्डकी र कर्णाली प्रदेशका पहाडी क्षेत्रहरूमा हल्कादेखि मध्यम वर्षाको सम्भावना रहेको छ। बाँकी भू-भागमा मौसम सामान्य रूपमा सफा रहनेछ।
