२५ वर्षयता प्लस टु मा फेल भएकालाई मौका परीक्षा दिने

नेत्र दैनिक
२५ कार्तिक २०८१, आईतवार ०९:५४

काठमाडौं – प्लस टु (कक्षा ११ र १२) मा फेल भएका २०५६ सालदेखि २०७६ सालसम्मका विद्यार्थीहरूका लागि राष्ट्रिय परीक्षा बोर्डले एकपटकको मौका परीक्षा दिने व्यवस्था गरेको छ।

बोर्डको सूचना अनुसार, रजिस्ट्रेसन नम्बरको सुरूको अंक ५६ देखि ७७ भित्रका विद्यार्थीले यो परीक्षामा सहभागी हुने अवसर पाउनेछन्। यसअन्तर्गत कुनै पनि विषयमा अनुत्तीर्ण भएका वा तोकिएको ग्रेड प्राप्त गर्न नसकेका विद्यार्थीलाई सहभागी गराइनेछ। प्रयोगात्मकतर्फ फेल भएका विद्यार्थीहरूले समेत फाराम भर्न सक्नेछन्।

विद्यार्थीहरूले आवेदन फाराम सम्बन्धित विद्यालयबाट मंसिर २७ सम्म बुझाउनुपर्नेछ। यसका साथै, हाल खारेज भइसकेका विद्यालयका विद्यार्थीले बोर्डमा सोझै सम्पर्क गरी आवेदन दिन सक्नेछन्। परीक्षाको मिति र केन्द्र आवेदन संख्याका आधारमा पछि तोकिनेछ।