भक्तपुर, ४ पुस।यस वर्षदेखि कक्षा १० को अन्तिम परीक्षा अर्थात् एसईईमा विद्यार्थीले ‘नो ग्रेड’ (एनजी) आएको विषयको मात्रै परीक्षा दिन पाउने भएका छन्। परीक्षा नियन्त्रण कार्यालय सानोठिमीले यस वर्षदेखि लागू हुने गरी यो नयाँ व्यवस्था ल्याएको हो।
परीक्षा नियन्त्रक नन्दलाल पौडेलका अनुसार, लेटर ग्रेडिङ निर्देशिका २०७८ लाई संशोधन गरी, अबदेखि जुन विषयमा ‘एनजी’ आएको हो, सोही विषयको मात्रै परीक्षा दिन पाइनेछ। विद्यार्थीले यो अवसर तीन वर्षसम्म उपयोग गर्न सक्नेछन्।
निर्देशिका अनुसार, कक्षा ८, १०, र १२ मा सैद्धान्तिकतर्फ न्यूनतम ‘डी’ ग्रेड र प्रयोगात्मकतर्फ ‘सी’ ग्रेड ल्याउन अनिवार्य गरिएको छ। नियमित र ग्रेड वृद्धि परीक्षामा पनि कम्तीमा ‘डी’ ल्याउनुपर्ने प्रावधान लागू गरिएको छ।
यस वर्षको कक्षा १० को अन्तिम परीक्षा आगामी चैत ७ गतेदेखि सुरु हुने जानकारी गराइएको छ। यस व्यवस्थाले विद्यार्थीलाई आफ्नो नतिजा सुधार गर्ने थप अवसर प्रदान गर्ने विश्वास गरिएको छ।
