लहान- नेपालको कुशवाहा कल्याण समाज सिरहा जिल्ला कार्य समितिले केन्द्रिय कार्य समितिको असहमति र फेसबुक/सामाजिक सञ्जालमा स्थगन सूचना आएको बाबजुद १०औं जिल्ला अधिवेशन आफ्नै भवनमा प्रतिनिधि मुलक रूपमा सञ्चालन गर्ने निर्णय गरेको छ।
जिल्ला अध्यक्ष धनपति महतोले पत्रकार सम्मेलनमा बताए अनुसार, विगत ६ वर्षदेखि केन्द्रिय कार्य समितिले जिल्ला स्तरका निर्णयप्रति निरन्तर गैरजिम्मेवारी देखाएको छ। “हामीले २०७६ देखि तोकिएका कार्यतालिका अनुसार अधिवेशन आयोजना गर्न खोज्दा बारम्बार रोकावट भयो। तर जिल्ला समितिको निर्णय, सदस्यहरुको उपस्थिती र सबै तयारी पूरा भइसकेको छ। अब अधिवेशन गोलबजारस्थित कुशवाहा भवनमा हुनेछ,” उनले भने।
महतोले स्पष्ट पारे, “सुरक्षा र सरकारी प्रतिबन्धको नाममा अधिवेशन स्थगित गर्ने सूचना सामाजिक सञ्जालमार्फत भाइरल गराउनु अनुचित हो। जिल्ला प्रशासनले सभा/अधिवेशनमा कुनै प्रतिबन्ध नराखेको छ।”
यस घटनाले नेकुक समाजको जिल्ला–केन्द्रिय सम्बन्धमा बढ्दो तनावलाई उजागर गरेको छ। पत्रकार सम्मेलनमा महतोले सबै कुशवाहा बन्धुलाई सहभागी हुन र अधिवेशनमा आफ्नो प्रतिनिधित्व सुनिश्चित गर्न आग्रह गरेका छन्।
