काठमाडौं – प्रधानमन्त्री केपी शर्मा ओलीले यस वर्षको विजयादशमी प्राकृतिक विपद्का बीच आपसी सहयोग र सद्भावका साथ मनाउन सबै नेपालीलाई आह्वान गरेका छन्।
विजयादशमी २०८१ को अवसरमा जारी भिडियो सन्देशमा उनले देशभित्र र विदेशमा रहेका नेपालीलाई शुभकामना व्यक्त गर्दै बाढी, पहिरो जस्ता प्राकृतिक प्रकोपले सिर्जना गरेको पीडाबाट उकास्न ‘होस्टेमा हैसे’ मिलाउन आग्रह गरे। उनले विपद् पीडितको सहयोगका लागि सबैले हातेमालो गर्न आवश्यक रहेको औंल्याए।
प्रधानमन्त्री ओलीले भने, “विपद्को घडीमा मेरो मन भारी छ। दशैंको उल्लासमा रमाउनुपर्ने यो बेला धेरै नेपाली दिदीबहिनी र दाजुभाइ विपद्का कारण रमाउन नसकिरहेको अवस्थामा छन्।” उनले बाढी र पहिरोका कारण धेरैले ज्यान गुमाउनु परेको, बालबालिका, जेष्ठ नागरिक र अन्य निर्दोष व्यक्तिहरू पीडित भएको भन्दै दुःख प्रकट गरे।
सरकारले प्रकोप प्रभावित क्षेत्रमा उद्धार, राहत, पुनःस्थापनामा ध्यान केन्द्रित गरिरहेको जानकारी दिँदै, प्रधानमन्त्रीले किसानको क्षति भएको बालीनालीको मूल्यांकन गरेर उचित क्षतिपूर्ति प्रदान गरिने र भत्किएका घरहरूको पुनर्निर्माण शीघ्र सम्पन्न गरिने आश्वासन पनि दिए।
उनले भने, “सरकार जिम्मेवारीप्रति पूर्ण सचेत छ। सबैलाई धैर्य राख्न र मिल्नेहरूले टीका लगाई दशैंको शुभकामना आदानप्रदान गर्न आग्रह गर्दछु।”
प्रधानमन्त्री ओलीले यसपालिको दशैं टीका उल्लासपूर्ण नभए पनि पीडामा परेकाहरूलाई सहयोग गरी समाजलाई पुनः सामर्थ्यमा फर्काउन सबै नेपालीले एकअर्कालाई साथ दिनुपर्ने आवश्यकता औंल्याए।
विपद्का पीडालाई कम गर्न सरकार प्रतिबद्ध रहेको भन्दै उनले सबैलाई धैर्यता अपनाउन र सकारात्मक रहन आह्वान गरेका छन्।
