सुर्खेत ।सुर्खेतको वीरेन्द्रनगरमा सेन्टर फर मेन्टल हेल्थ एण्ड काउन्सिलिङ (सिएमसी–नेपाल)द्वारा आयोजित प्रदेशस्तरीय समन्वय बैठकमा मानसिक स्वास्थ्य समस्यासँग जोडिएका मुद्दामा सबै पक्ष गम्भीर हुनुपर्नेमा सरोकारवालाले जोड दिएका छन्।
बैठकमा गरिबी र मानसिक स्वास्थ्यबीचको सम्बन्धबारे चर्चा गर्दै कोशिस संस्थाका सूर्यप्रसाद भट्टराईले सस्तो औषधिमा मात्र निर्भर गर्नुपरेको समस्या औंल्याए। राष्ट्रिय मानवअधिकार आयोग कर्णालीका प्रमुख रमेशकुमार थापाले मानसिक रोगीहरूको अधिकार संरक्षण गर्न राज्यको दायित्व रहेको बताए।
कर्णाली प्रदेशका सामाजिक विकास सचिव दीर्घबहादुर पोखरेलले ‘मानसिक स्वास्थ्य तथा मनोसामाजिक रणनीतिक कार्ययोजना–२०७९’ कार्यान्वयनमा प्रदेशले अग्रसरता लिएको जानकारी गराए। प्रदेश स्वास्थ्य आपूर्ति व्यवस्थापन केन्द्रका प्रमुख डा. शक्तिकुमार सुवेदीले मानसिक स्वास्थ्य सुधारका लागि घर र विद्यालयमा जनचेतनामूलक कार्यक्रम आवश्यक रहेको बताए।
सिएमसी नेपालका हिमाल गैरेले कर्णालीका सात जिल्लाका २५ स्थानीय तहमा मानसिक स्वास्थ्य सुधारका कार्यक्रम सुरु गरिएको जानकारी दिए।
