काठमाडौं – नेकपा एमालेले नयाँ केन्द्रीय कार्यालय भवन निर्माणको शिलान्यास गरेको छ। प्रधानमन्त्री तथा एमाले अध्यक्ष केपी शर्मा ओलीले शुक्रबार कीर्तिपुर नगरपालिका–२, मैत्रीनगरमा अत्याधुनिक भवनको शिलान्यास गरे। यो भवन भाटभटेनीका सञ्चालक मीनबहादुर गुरूङ र उनकी पत्नी सावित्री गुरूङले दान गरेको १० रोपनी १४ आना जग्गामा बन्नेछ।
भवन निर्माणका लागि विस्तृत योजना र लागत तर्जुमा भइरहेको एमाले महासचिव शंकर पोखरेलले जानकारी दिएका छन्। गुरूङले अन्य पार्टीहरूलाई पनि सहयोग गरेको भन्दै, एमालेलाई विशेष रूपमा सहयोग गर्न पाउनु गर्वको विषय भएको बताए। उक्त भवन एक वर्षभित्रै सम्पन्न गरी हस्तान्तरण गर्ने योजना रहेको छ।
२०७२ सालको भूकम्पले बल्खुस्थित एमालेको पुरानो कार्यालय भवन ध्वस्त भएपछि एमालेले नयाँ स्थानको खोजी गर्दै आएको थियो। अहिले पार्टी कार्यालयलाई व्यवस्थित बनाउन सदस्यहरूबाट १०० रूपैयाँ संकलन गर्ने अभियान सञ्चालन गरिएको छ।
एमालेको यस नयाँ भवनले पार्टीको कार्य सम्पादनमा थप सहजता ल्याउने अपेक्षा गरिएको छ।
