काठमाडौं — विपद् व्यवस्थापनमा निरन्तर खटिरहेका सशस्त्र प्रहरी निरीक्षक दिलबहादुर बडुवालको आज बिहान एपीएफ अस्पताल बलम्बुमा निधन भएको छ। सशस्त्र प्रहरी बलका अनुसार उनी ज्वरो र स्वास्थ्यसम्बन्धी अन्य समस्याका कारण असोज २६ गते अस्पताल भर्ना भएका थिए। उनको उपचारकै क्रममा सोमबार बिहान निधन भएको हो।
बर्दिया निवासी बडुवालले २०६० सालमा असई पदबाट सशस्त्र प्रहरीमा सेवा प्रवेश गरेका थिए। उनी हाल सशस्त्र प्रहरी बलको विपद् व्यवस्थापन बेसको कमान्डरको रूपमा कार्यरत थिए। गत असार २ गते काभ्रेको पनौती नगरपालिका-५ मा स्थापना गरिएको उक्त बेसमा साउन ३ देखि उनको नेतृत्वमा कार्य भइरहेको थियो।
पछिल्लो पटक असोज ११ गतेदेखि परेको अविरल वर्षाले काभ्रेका विभिन्न क्षेत्रमा पुर्याएको धनजनको क्षतिमा उद्धार र राहतका लागि उनको कमान्डमा टोली परिचालित भएको थियो। रोशी, भूमिडाँडा, बेथानचोक, नार्केबजार, मंगलटार, कालढुंगा र बाल्टिङलगायतका स्थानमा उद्धारकार्यमा उनको नेतृत्वमा टोली सक्रिय थियो।
उनको अन्त्येष्टि आज साँझ पशुपति आर्यघाटमा फौजी सम्मानका साथ गरिने तयारी गरिएको छ।
