काठमाडौं। नेपाल सरकारले किशोरीलाई पाठेघरको मुखको क्यान्सरबाट बचाउनका लागि एचपिभी (ह्युमन प्यापिलोमा भाइरस) खोप अभियान सुरु गर्ने भएको छ। स्वास्थ्य सेवा विभाग बाल स्वास्थ्य तथा खोप शाखाका प्रमुख डा. अभियान गौतमले कक्षा ६ देखि १० सम्मका विद्यालयमा अध्ययनरत र विद्यालय बाहिर रहेका १० देखि १४ वर्षका करिब १६ लाख ८८ हजार किशोरीलाई लक्षित गरी यो खोप अभियान सञ्चालन गर्न लागिएको जानकारी दिए।
यस अभियान माघ महिनामा १५ दिनसम्म सञ्चालन हुनेछ। विद्यालयभित्रका किशोरीहरूलाई विद्यालयमै खोप केन्द्र स्थापना गरी खोप प्रदान गरिनेछ भने विद्यालय बाहिर रहेका किशोरीहरूलाई स्वास्थ्य संस्थामा गएर खोप लगाउन सकिने व्यवस्था गरिएको छ। यसअघि नमूनाका रूपमा सात प्रदेशका एक–एक सङ्घीय अस्पतालमा यो खोप लगाइएको थियो।
डा. गौतमका अनुसार यो नेपालमा पाठेघरको मुखको क्यान्सरविरुद्धको सबैभन्दा ठूलो अभियान हो। यो खोप एकपटक लगाएपछि जीवनभर प्रभावकारी हुने हुँदा किशोरी र अभिभावकलाई यस अभियानमा सहभागी हुन आग्रह गरिएको छ। खोपको लागत करीब ६ हजार रुपैयाँ भए पनि सरकारले यसलाई निःशुल्क प्रदान गर्नेछ।
पाटन स्वास्थ्य विज्ञान प्रतिष्ठानका वरिष्ठ क्यान्सर विशेषज्ञ डा. अरुण शाहीका अनुसार कलिलो उमेरमा विवाह, धूमपान, मद्यपान, र यौनाङ्गको सरसफाइमा कमीका कारण ह्युमन प्यापिलोमा भाइरसको जोखिम बढ्ने भएकाले यस खोपको महत्त्वपूर्ण भूमिका रहन्छ। उनले यो खोप ९९ प्रतिशत प्रभावकारी रहेको जानकारी गराउँदै सबै किशोरीलाई यो खोप लगाउन सिफारिस गरेका छन्।
