काठमाडौँ — काठमाडौँ महानगरपालिकाले सामुदायिक विद्यालयका विद्यार्थीहरूलाई खेलकुदमा प्रोत्साहित गर्न ‘ग्रासरुट’ कार्यक्रम सुरु गरेको छ। करिब १५ हजार विद्यार्थीले विभिन्न खेलकुदमा रुचि देखाएपछि १८ वटा केन्द्रमा खेलाडी छनोट प्रक्रिया अन्तिम चरणमा पुगेको छ।
कार्यक्रममा कक्षा ४ देखि १२ सम्मका विद्यार्थीहरूलाई १७ विधाका खेलमा प्रशिक्षण दिइनेछ। फुटबल सबैभन्दा लोकप्रिय खेलका रूपमा रहेको छ भने त्यसपछि ब्याडमिन्टन, भलिबल, क्रिकेट, तेक्वान्दो, बास्केटबल, कराँते, कवड्डी, बक्सिङ, चेस, खो-खो, हक्की, उसु, जुडो र अन्य खेलमा विद्यार्थीको चासो देखिएको छ।
विद्यार्थीहरूलाई जुनियर छात्रा-छात्र (कक्षा ४–८) र सिनियर छात्रा-छात्र (कक्षा ९–१२) गरी चार समूहमा विभाजन गरेर तीन महिनासम्म नियमित, विदाका दिन तथा छुट्टीको समयमा प्रशिक्षण प्रदान गरिनेछ। कक्षा १० का विद्यार्थीलाई भने खेलकुदमा भन्दा एसईई तयारीमा प्रोत्साहित गरिनेछ।
महानगरले माघको अन्त्यसम्ममा सामुदायिक र संस्थागत विद्यालयका विद्यार्थीबीच प्रतियोगिता आयोजना गर्ने योजना बनाएको छ। प्रतियोगिता जित-हारभन्दा पनि अन्तर्राष्ट्रिय स्तरका मापन पद्धति सिकाउन केन्द्रित हुनेछ।
काठमाडौँका मेयर बालेन शाहका अनुसार यो कार्यक्रमले विद्यार्थीहरूलाई अन्तर्राष्ट्रिय मञ्चका लागि खेलकुदमा तयारी गराउने उद्देश्य राखेको छ। प्रशिक्षण र प्रतिस्पर्धाका माध्यमबाट उत्कृष्ट खेलाडीहरूको पहिचान र विकास हुँदै राष्ट्रिय तथा अन्तर्राष्ट्रिय खेलकुदमा देशको प्रतिनिधित्व गर्ने खेलाडी उत्पादन हुने महानगरको अपेक्षा छ।
शैक्षिक विकाससँगै खेलकुदलाई जोड्नेमार्फत विद्यार्थीहरूको समग्र व्यक्तित्व विकासमा यसले टेवा पुर्याउने विश्वास गरिएको छ।
