प्रदिप सिंह
लहान ।सिराहाको लहान नगरपालिका-१९ छाडापट्टीमा आजदेखि वार्षिक पहलमानी प्रतियोगिता सुरु भएको छ। स्थानीय राजलाल यादवको पहलमा हरेक वर्ष आयोजना हुँदै आएको यो प्रतियोगिता यसपटक पनि भव्य रूपमा सुरु भएको हो।
कार्यक्रमका प्रमुख अतिथि लहान नगरपालिकाका प्रमुख महेशप्रसाद चौधरी रहेका थिए। उनले पहलमानसँग हात मिलाउँदै प्रतियोगिताको औपचारिक सुरुआत गराए। प्रतियोगितामा वडा अध्यक्ष कमरुदिन रायनको विशेष सहयोग रहेको छ भने समाजसेवी कमलदेव चौधरीका अनुसार छाडापट्टीमा वर्षौंदेखि यो परम्परा निरन्तर चल्दै आएको छ।
यस वर्षको पहलमानीमा नेपाल र भारतका गरी जम्मा ३० जना पहलमान सहभागी छन्। नेपालका चर्चित पहलमान बसन्त थापासहित विभिन्न प्रतिस्पर्धीहरू उपस्थित रहेको जानकारी जे.एस. मुरारका बहुमुखी क्याम्पस, लहानका स्ववियु सभापति रामकृष्ण यादवले दिएका छन्।
प्रतियोगितामा हजारौं दर्शक उपस्थित भएका छन्। रोमाञ्चक भिडन्तहरूले दर्शकलाई भरपूर मनोरञ्जन प्रदान गरेको छ। पहलमानी भोलि दिउँसो १ बजे पुनः सुरु हुने आयोजकले जनाएका छन्।
