सप्तरी साउन २१।सप्तरीको राजगढ गाउँपालिका–२, कमलपुरमा मदिरा तस्करी नियन्त्रणका लागि पुगेको प्रहरीमाथि स्थानीय समूहले आक्रमण गरेपछि भएको झडपमा एक व्यक्तिको ज्यान गएको छ। मंगलबार राति भएको घटनामा प्रहरीको गोली लागेर ३५ वर्षीय लालु यादवको मृत्यु भएको हो।
जिल्ला प्रहरी कार्यालय सप्तरीका डिएसपी जितेन्द्रकुमार बस्नेतले घटनाको पुष्टि गरेका छन्। उनका अनुसार भारततर्फ तस्करी गर्न तयारी अवस्थामा राखिएको मदिरा रहेको गोप्य सूचनाका आधारमा इन्स्पेक्टर वीरेन्द्रकुमार यादवको कमाण्डमा प्रहरी टोली खटिएको थियो।
सो टोलीमाथि स्थानीयले आक्रमण गरेपछि आत्मरक्षाको लागि प्रहरीले चार राउण्ड हवाई फायर गरेको डिएसपी बस्नेतले बताए। सोही क्रममा गोली लागेर यादव गम्भीर घाइते भएका थिए। उनको बायाँ तिघ्रामा गोली लागेको थियो।
घाइते यादवलाई साढे ११ बजे गजेन्द्रनारायण सिंह सगरमाथा अस्पताल, राजविराज लगिएको थियो। तर उपचारकै क्रममा उनको मृत्यु भएको प्रहरीले जनाएको छ।
घटनामा ढुङ्गामुढाबाट दुई जना प्रहरी पनि घाइते भएका छन्। तनावग्रस्त अवस्था नियन्त्रणमा लिन खोज्दा झडप चर्किएको थियो।
प्रहरीले घटनास्थलबाट ८० कार्टुन मदिरा बरामद गरेको छ। अन्य केही तस्करहरू भने भाग्न सफल भएका थिए। बरामद मदिरा भारततर्फ तस्करी गर्न तयारी गरिएको प्रहरीले जनाएको छ।
