हुम्ला ।सडक सञ्जालबाट टाढा रहेको हिमाली जिल्ला हुम्लामा रहेको सिमकोट विमानस्थलमा तीन दिनको अन्तरालपछि पुनः हवाई सेवा सुरु भएको छ। दसैँको अघिल्लो दिनमात्रै हवाई उडान भएपश्चात यात्रुको कमीका कारण केही दिन उडान स्थगित भएको थियो। सोमबारदेखि भने पुनः तारा एयर र नेपाल एयरलाइन्सले उडान भरेका छन्।
नेपाल एयरलाइन्सका सिमकोट स्टेशन प्रमुख छिरिङ लामाका अनुसार सोमबार नेपालगन्जबाट तारा एयरले एक पटक र नेपाल एयरलाइन्सले दुई पटक उडान गरेका हुन्। दुबै एयरलाइन्सले यात्रुसँगै दैनिक उपभोग्य वस्तु र अन्य सामग्रीको ढुवानीसमेत गरेका छन्।
प्रमुख लामाले मङ्गलबारका लागि टिकट बुकिङ भइसकेको जानकारी दिँदै यात्रुको चाप विस्तारै बढ्ने अपेक्षा गरेका छन्। हुम्लाबाट बाहिर जाने यात्रुहरूको संख्या अधिक भए पनि नेपालगन्ज र सुर्खेतबाट आउने यात्रुहरूको चाप भने सामान्य रहेको बताए।
यता, सीता एयर र समिट एयरले भने सोमबार उडान नगरेको सिमकोट विमानस्थल कार्यालयले जनाएको छ।
