नवलपरासी।पश्चिम नवलपरासीको सरावल गाउँपालिका–५, धनगडवामा १८ करोड रुपैयाँको लागतमा १५ शय्याको आधारभूत अस्पताल निर्माणको काम सुरु भएको छ। संघीय सरकारको स्वास्थ्य मन्त्रालयले यो अस्पतालका लागि बजेट विनियोजन गरेसँगै निर्माण प्रक्रिया अघि बढाइएको हो। अस्पतालले स्थानीयलाई सहज स्वास्थ्य सेवा उपलब्ध गराउने विश्वास गरिएको छ।
सरावल गाउँपालिकाका अध्यक्ष सुखाडीप्रसाद चौधरीका अनुसार यसअघि गाउँपालिकामा आधारभूत स्वास्थ्य सेवा अभावकै कारण स्थानीयहरूलाई उपचारका लागि परासी, भैरहवा, र बुटवलजस्ता शहरसम्म पुग्नुपर्ने बाध्यता थियो। नयाँ अस्पताल बनेसँगै यस क्षेत्रका नागरिकले समयमै स्वास्थ्य सेवा पाउनेछन् र यसले उनीहरूको जीवनस्तर सुधार गर्न महत्त्वपूर्ण योगदान पुर्याउने अपेक्षा गरिएको छ।
अस्पतालले आधारभूत सेवा र सुविधाहरू उपलब्ध गराउने योजना रहेको बताउँदै अध्यक्ष चौधरीले यसको निर्माण कार्यलाई चाँडै सम्पन्न गर्न बोलपत्र प्रक्रिया सम्पन्न गरिसकेको जानकारी दिनुभयो।
अस्पतालको निर्माणका लागि स्थानीय बासिन्दाहरूले ठूलो सहयोग गरेका छन्। सरावल–५ का वडाध्यक्ष लक्ष्मणप्रसाद चौधरीका अनुसार स्थानीयहरूले दुई बिघा छ कठ्ठा दुई धुर जग्गा दान दिएका छन्, जसले अस्पताल निर्माणमा महत्वपूर्ण सहयोग पुर्याएको छ।
स्थानीय दिनेश सहानीले अस्पतालको निर्माणसँगै अब गाउँमै आधारभूत स्वास्थ्य सेवा पाउने आशा व्यक्त गर्दै यसले गाउँका नागरिकलाई उपचारका लागि टाढा जानुपर्ने समस्या अन्त्य गर्ने विश्वास व्यक्त गरे।
यो अस्पताल निर्माणपछि सरावल र वरपरका गाउँहरूले प्रत्यक्ष स्वास्थ्य लाभ लिन सक्नेछन्, जसले स्वास्थ्य क्षेत्रमा नयाँ परिवर्तन ल्याउनेछ।
