लहान, ३१ बैशाख।सामाजिक सुधार अब भाषण र नारामा मात्र सीमित रहने समय गइसकेको संकेत दिने एक ऐतिहासिक घटनाले सिरहाको माडरलाई चर्चामा ल्याएको छ। सिरहा नगरपालिकास्थित माडर निवासी ब्राह्मण समुदायका अवधेश कुमार झा र मण्डल समुदायकी बन्दना कुमारी मण्डलबीच हालै सम्पन्न भएको अन्तरजातीय र दहेजविहीन विवाहले मिथिला क्षेत्रको सामाजिक संरचना हल्लाएको छ।
परम्परागत सोच र जातीय बन्धन चिर्दै गरिएको यो विवाहले न त दानदक्षिणा माग्यो, न त भड्किलो तामझाम। दुई परिवारबीचको आपसी समझदारीमै विवाह सम्पन्न भएको हो।
समाजशास्त्रका स्नातक अवधेश भन्छन्, “सामाजिक न्याय र समानताको कुरा पढेर मात्र होइन, त्यसलाई व्यवहारमा उतार्नुपर्ने बेला आएको थियो।” बन्दना, जो एक स्थानीय विद्यालयमा शिक्षिका हुन्, स्पष्ट रूपमा भन्छिन्, “हाम्रो सम्बन्ध आत्मीयताको हो, जातको होइन।”
स्थानीय सामाजिक अभियन्ता रामबाबु ठाकुर यो कदमलाई उदाहरणीय भन्दै भन्छन्, “सिरहाजस्तो परम्परागत सोच बलियो जिल्लामा यस्तो साहसी निर्णय सामाजिक समावेशिताको बलियो संकेत हो।”
विवाहमा दुवै पक्षका परिवारको सहमति र समर्थनले झनै सन्देशपूर्ण बनाएको छ। सामाजिक सञ्जालदेखि बौद्धिक वृत्तसम्म यो विवाहको सकारात्मक चर्चा भइरहेको छ। स्थानीय प्रतिनिधिहरूले यसलाई “सिरहाबाट सुरु भएको सामाजिक क्रान्ति” को संज्ञा दिएका छन्।
अवधेश–बन्दना युगलको यो कदमले अब भाषणको भरमा होइन, कर्मको माध्यमबाट पनि सामाजिक परिवर्तन सम्भव छ भन्ने पुष्टि गरेको छ। यो उदाहरणले मिथिलाञ्चलका युवाहरुलाई सामाजिक कुरीति र असमानताविरुद्ध उभिन हिम्मत दिने विश्वास गरिएको छ।
